Agnar Prestá
Sunnudagin segði Chelsean enn ein venjara upp. Onglendingurin Graham Potter fann ongantíð fótafesti í stóra London-felagnum, eftir at Chelsea keypti hann leysan úr Brighton í heyst.
Tá hevði Chelsea, stutt eftir eigaraskifti, sagt týskaran Thomas Tuchel úr starvi. Venjarin sum var áðrenn; tað var Frank Lampard. Hann varð uppagdur í januar 2021 eftir eitt og eitt hálvt ár í heita stólinum á Stamford Bridge. Nú er Lampard aftur í felagnum, ið hann gjørdi so nógv fyri um spælari.
Hann sást á áskoðaraplássinum til dystin móti Liverpool týskvøldið, tá Chelsea - enn einaferð - spældi javnleik. Í gjárkvøldið skrivaðu millum annað Fabrizio Romano og Sky Sports, at Chelsea ætlaði at seta Frank Lampard sum fyribils venjara. Síðsta starvið hjá honum var í Everton, har venjarin í januar, eftir beint undir eitt ár í sessinum, varð sagdur úr starvi.
Sambært Sky Sports hevur 44-ára gamli lokali venjarin ábyrgd av venjingini í dag og av dystinum á útivølli móti Wolves leygardagin.
Chelsea hevur tíggju dystir eftir í Premier League og er á 11. plássi við 39 stigum. Tað er ósannlíkt, at liðið røkkir Champions League-plássi, men í júst Champions League er Chelsea í fjórðingfinaluni. Týsdagin, 12. apríl, skal liðið við Lampard á odda til Madrid. Tað er tann fyrra fjórðingsfinalan móti Real Madrid.
Vinarliga broyt tínar kennifíla - og privatlívsstillingar fyri at síggja hetta innihald