Linfield var ikki langt frá bólkaspælinum

Nú er greitt, hvørji 48 lið skulu spæla í bólkaspælinum í Europa League. Arsenal, Manchester United, Sevilla, Roma og stóru Glasgow-feløgini eru ímillum tey, ið eru í pottinum í Sveis á middegi.

Linfield rakk ikki sínum fyrsta evropeiska bólkaspæli nakrantíð orsakað av útivallarmálum. Eftir 3-2 sigur í Belfast tapti liðið, sum sló HB út, 2-1 í Aserbadjan í gjár. Tað var spennandi heilt ímóti endanum, men Qarabag var omaná.

HB hevði Linfield á knøunum í Føroyum, men føroyameistararnir kendu ikki sína vitjunartíð frammanfyri málinum. Tað endaði tí 2-2, og á Windsor Park vann Linfield 1-0; málið kom við brotssparki.

Í umfarinum eftir HB, og undan hesum, vann Linfield báðar dystirnar á Sutjeska úr Montenegro.

(Linfield megnaði at sleppa úr Gundadali uttan at tapa - Mynd: Olaf Olsen)

FC København tapti 1-0 í Riga, og lettiska liðið var sera tætt við at skora til 2-0 í yvirtíðini og harvið koma víðari.

Sten Grytebust stórbjargaði tó, og skaðaplágaða FCK er, saman við Malmö FF, skandinaviska umboðið í bólkaspælinum.