Liverpool svaraði aftur

Tann fyrsti av dagsins trimum Premier League dystum varð leiktur í sól, vindi og kavaælum á Anfield. Hetta ávirkaði tó ikki so nógv, at liðið hjá Klopp snávaði í oddastríðnum.

Tað byrjaði annars illa hjá heimaliðnum. Liverpool hevur ikki latið mál inn seinastu fimm dystirnar, men eftir fimm minuttir skoraði Ashley Westwood við góðum hornsparki. Hann brúkti vindin og fekk nógva skrúu, og tað hjálpti helst væl, at James Tarkowski forstýraði Allison nógv. Tað kundi væl verið dømt fríspark í støðuni, men málið varð viðurkent.

Liverpool fekk tó reist seg, og eftir stóra yvirvág javnaði Firmino eftir upplegg frá Salah. Løtu seinni kloddaði Burnley bóltin burtur beint við egnan brotsteig, bólturin endaði hjá Mané, ið smekkaði bóltin kyniskt í málið. Burnley hevði í løtunum í 2. hálvleiki nakrar støður, men heimaliðið var sterkari, og Firminio avgjørdi í roynd og veru dystin við 3-1 málinum miðskeiðis í hálvleikinum.

Dysturin var í tómgongd í einar 20.minuttir, men so minkaði íslendski Guðmundsson um munin í 91. minutti og fekk eitt lítið sindur av spenningini í aftur. Men Mané svarði aftur, og tey trý stigini vórðu verandi í Liverpool. Hetta merkir at munurin aftur er 1 stig í oddinum, nú átta dystir eru eftir. Ein góð upptakt hjá Liverpool, sum fekk gongd á málskjótingina aftur, undan uppgerðini í Munchen týskvøldið. Burnley er í einum tøttum botnstríðið, og liðini rundanum vunnu øll í gjár. 

Liverpool - Burnley 4-2 (2-1)
0-1 Ashley Westwood 
1-1 Roberto Firmino
2-1 Saido Mané
3-1 Roberto Firmino
3-2 Jóhann Berg Guðmundsson
4-2 Saido Mané