Martin skoraði í sínum fyrsta dysti fyri Fremad

Fyri tveimum vikum síðani, nakrar fáar tímar áðrenn danska flytingarvindeygað lat aftur, keypti Aarhus Fremad Martin Agnarsson leysan úr Viborg.

Les eisini: Vilborg hevur selt Martin Agnarsson

Ungi vinstri bakkurin var nógv darvaður av skaðum í tíðini í Superliga-felagnum, og hevur nú tikið eitt fet ella tvey niður í mun til stig. Tað at spæla við Aarhus Fremad í triðbestu donsku deildini fer tó at geva unga havnarmanninum meira spælitíð á rímiligum vaksnamannastigi.

Martin hevur verið við U21-landsliðnum og spældi sínar fyrstu minuttir fyri nýggja felagið sunnudagin seinnapartin. Hetta eydnaðist bara heilt væl, tí Fremad vann í Thisted, og Martin Agnarsson skoraði.

Vinstrabeinti føroyingurin varð skiftur inn í 70. minutti, tá støðan var 1-0 til hansara lið, og seks minuttir seinni sló Martin til. Tað endaði við 2-0 sigri móti U21-landsliðsliðfelagnum Heina Fossdalsá Sørensen.

20-ára gamli Heini Fossdalsá Sørensen hevur seinastu mánðairnar spælt fast í Thisted

Anders Holvad hevur eitt FM-gull við KÍ (Savnsmynd: Sverri Egholm)

Hitt málið hjá Aarhus Fremad skoraði Anders Holvad. Royndi danski áleyparin spældi við KÍ í fimm mánaðir í 2022.

Eftir 7. umfar í 2. Division liggur Aarhus Fremad á 2. plássi og harvið væl fyri í uppflytingarstríðnum. Heini Sørensen og Thisted liggja triðniðast í deildini við tólv liðum. Bæði føroyingafeløgini í deildini spæla aftur næsta vikuskifti.