Nærum lagnudagur hjá fleiri liðum í fremstu deildini

24. og fjórðseinasta umfar í Betrideildini hjá monnum er á skránni seinnapartin og út á kvøldið.

24. umfar í Betrideildini hjá monnum
Í dag, sunnudagin 28. september

15.00: 
B36 - Víkingur (FM1)
EB/Streymur - HB
07 Vestur - NSÍ

17.15: B68 - KÍ

17.30: TB - FC Suðuroy (FM1)

Til ber at fylgja gongdini í øllum dystunum ovast á Portalinum

Støðan:

Føroyameistaraheitið kann verða staðfest í dag, um NSÍ ikki fær fult, og KÍ vinnur. Tað hevur tó verið so at siga greitt í longri tíð, at KÍ fer at vinna FM. Tað er størri spenningur í stríðnum um 2. plássið, har HB og NSÍ í dag hava uppgávu, sum tey skulu vinna - men sum kunnu gerast lumpisligar.

Annars eru tað serliga botnstríðið og 4. plássið (møguligt evropeiskt pláss), sum eru á breddanum í dagsins umfari.

Har skal TB vinna á FC Suðuroy, og í Havn hevur B36 ikki ráð at tapa fyri Víkingi, sum betri kann liva við einum stigi. Fyri FC Suðuroy verður ein sigur tó so at siga eisini eitt krav í stríðnum við 07 Vestur - og TB - um at halda sær í deildini.

Tvøramenn eru tvey stig frá strikuni, og tí krevjast trý stig í seinasta innanhýsis brondystinum í ár. Fyri TB er tað ein stórur smeitur, at málverjin Anders Tønnesen hevur (ivasamt) leikbann. Tó er Nikolei Johannesen komin aftur til Føroya fyri at spæla dystin.

Nikolei Johannesen og Fríði Holm, sum báðir skoraðu í undirhaldandi 2-3 dystinum við Stóra 5. august (Mynd: Bjartur Vest)

Nógv fer at standa uppá spæl á áskoðaraplássinum eisini (Mynd: Bjartur Vest)

Bæði kunnu gerast brak: Kanska ikki tann penasti fótbólturin, serliga í Suðuroynni, men spenningur og helst eisini undirhald verða, nú so at siga alt verður uppá spæl.

Sí eisini: Beinleiðis stríð um 4. plássið í morgin

FM1 sigur frá bæði við Stóra (17.30) og í Gundadali (15.00). Til ber at fylgja gongdini í øllum dystunum ovast á Portalinum.