Norskur áleypari á veg til KÍ

Tað hevur í eina tíð ljóðað, at KÍ skal hava fatur á tveimum spælarum afturat til hópin. Sunnudagin staðfesti Magne Hoseth eisini í samrøðu við Portalin eftir stórsteypadystin, at breiðkast skal um hópin, og at okkurt var ávegis.

Nú er so ein leikari á veg. Íhvussu er sambært norska miðlinum rbnett.no, sum Norðlýsið siterar í dag. Talan er um áleypara, ið skal leggjast afturat vandamikla lokala málskjúttanum og arbeiðsgrevinum Páll Klettskarð. 

Sivert Gussiås hevur seinastu trý árini spælt fyri Sandefjord í Eliteserien. Fyrsta árið var áleyparin rímiliga fastur maður og skoraði sjey mál í 30 dystum. Í 2021 og 2022 hevur hann verið innskiftari og bert skorað eitt mál í bestu deildini, vísir Transfermarket.

Gussiås hevur eina fortíð og í ungdómsdeildini og á eykaliðnum hjá Molde saman við hjálparvenjaranum hjá KÍ, Daniel Beg Hestad. Hetta vísir Norðlýsið eisini á. Í 2019 leigaði Molde hann út til Strømmen í næstbestu deildini, har áleyparin, sum er 183 cm høgur, skoraði 12 mál í 27 dystum.

Nú var hann sáttmálaleysur og Hestad og Hoseth hava fingið fatur á honum. Sambært góðum keldum hjá Norðlýsinum ferðast álopsleikarin til Klaksvíkar í dag og verður væntandi kunngjørdur seinni í dag.