NSÍ nærri meistaraheitinum - so at siga sama støða í botninum

Tríggir dystir í 21. umfari í Mestaraideildini eru spældir í dag. Talan gjørdist um tveir 1-1 javnleikir og ein heimasigur til oddaliðið.

AB hevur gjørt tað ógvuliga trupult fyri NSÍ í ár. Í fyrsta dystinum millum liðini, avgjørdi Petur Knudsen í yvirtíðini móti uppflytarunum, sum vóru betri á degnum, og beint fyri summarsteðgin vann AB á heimavølli móti NSÍ. Argjamenn komu eisini á odda nærum beinanvegin við Løkin í dag, hóast liðið var uttan tríggjar útlendskar profilar: Jimmy Abdul og Obule Moses, ið vóru í leikbannsvanda, sótu uttanfyri fyrsta tíman, og Luca Ørsted Thorstensen.

NSÍ var merkt at deyðbóltsmálinum hjá Gunnari Reynslág, men í 2. hálvleiki setti oddaliðið tingini uppá pláss. Fyrst sjálvmál tíggju minuttir eftir steðgin, og tá tjúgu minuttir vóru eftir sló júst innskifti Meinhard Egillson Olsen til. Fyrsta málið hjá landsliðsleikaranum í føroyskum fótbólti síðani august 2020 - og tað fyrsta fyri barndómsfelagið síðani 2015.

Hetta kann fáa stóran týdning fyri NSÍ, sum nú er seks stig frammanfyri KÍ - KÍ spælir móti EB/Streymi í morgin. Petur Knudsen økti til 3-1 eftir brotsspark, sum AB-málverjin framdi móti Peturi. Men tveir minuttir seinni fekk NSÍ-liðformaðurin seinna gula kortið. Hetta tí at Heini Ziskason Viðoy metti, at Petur Knudsen filmaði í nærdysti við Jimmy Abdul. Útfrá sjónvarpsmyndunum sá hetta út sum NSÍ-fríspark, Petur og hinir á heimaliðnum ónøgdir, men nú hevur nummar 16 leikbann til dystin móti Víkingi.

1-1, 1-1 og framvegis tætt í botninum

B68 fór í Gundadali við nýggjum fyribils venjara, Martini Jarnskor, og eina løtu sá tað út til, at botnliðið fór avstað við øllum. B68 vísti tenn og fekk brotssoark eftir 81 minuttir. Tað setti fraklendingurin  Loick Jean Henri Lespinasse trygt í netið, men í yvirtíðini bjargaði fyrrverandi B68-arin, Ragnar Samuelsen, B36 eitt stig. Harvið slapp B36 ikki meira enn eitt stig afturat frá Víkingi í evropeiska stríðnum.

B68 kom eitt stig nærri EB/Streymi og strikuni, men Skála og 07 Vestur fingu eisini eitt stig hvør. Tey hittust til botnbrak á Skála og skoraðu eitt hvør fyri steðgin. Í 2. hálvleik ivar heimaliðið betri og rakti millum annað stongina, men talan gjørdist ikki talan um triðja sigurin á rað. Tó eitt betri úrslit hjá skálamonnum enn 07, í mun til stigatalvuna, og Skála fór eisini líka framum EB/Streym, sum spælir í morgin - alt enn ógvuliga tætt í botnstríðnum.

Yvirlit niðanfyri - dagført: 20.12