NSÍ tók oddasessin

FSF: Um vikuskiftið hevur fyrsta umfar í endaspælinum í Betrideildini hjá kvinnum verið á skránni.

Í ovara bólkinum møttust KÍ og NSÍ, og Víkingur og HB, meðan dystirnar í niðara bólkinum vóru millum B36 og TB/FCS/Royn, og FC Hoyvík og Skála.

Og sum úrslitini háttaðu seg, er NSÍ nýtt oddalið í ovara bólkinum, eftir at runavíkskvinnur leygardagin vunnu 2-1 á KÍ. Men tað er framvegis rættuliga tætt millum ovastu liðini, og í løtuni er tað bara málmunurin, ið skilir partarnar. NSÍ og Víkingur hava 36 stig, KÍ hevur 34 stig, og nummar 4 er HB við 27 stigum.

Tað vóru annars klaksvíkskvinnur, ið komu betri frá byrjan, og tá 12 minuttir vóru farnir legði Malena Olsen KÍ á odda. Men tá lítil hálvur tími var spældur javnaði Mirjam Huneck, og smáar tíggju minuttir eftir steðgin legði Julia Naomi Mortensen NSÍ á odda 2-1.

Í Sarpugerði í Norðragøtu tók Víkingur ímóti HB, og tá avtornaði fingu liðini hvør sítt mál og hvør sítt stig. Rebekka Benbakoura legði gestirnar á odda í 16. minutti, meðan Eydna Olsen Dalheim javnaði fyri heimaliðið tá eitt lítið korter var spælt av seinni hálvleiki.

Í niðara bólkinum heldur B36 fast í oddasessinum, eftir at B36 sunnudagin vann 5-0 á TB/FCS/Royn. Ester Ellingsgaard var í sonnum málhýri, og skoraði tríggjar ferðir fyri árstalsfelagið, meðan Ása Næss og Jasmin Mittún Darvishi gjørdu hvør sítt mál.

Fjórði dysturin í fyrsta umfari í endaspælinum var á Hoyvíksvøllinum, har FC Hoyvík tók ímóti Skála. Í hálvkeikinum var heimaliðið á odda 1-0, við máli sum Sofía Hansen skoraði.

Men eftir steðgin tók Skála yvir, og við trimum málum frá Saru Benjaminsen, og einum í part frá Sunnvu Fagradal og Vár Poulsen, vunnu skálakvinnur 5-2. Seinna málið hjá FC Hoyvík skoraði Margreta Olsen.