Óli toppskjútti og besta miðja í HM-endaspælinum

Í dag kom HM-endaspælið hjá U19-monnum at enda í Kroatia. Sum væntað gjørdust sterku spaniólarnir heimsmeistarar. Teir vunnu 28-23 á Danmark í finaluni. Hesin árgangurin vann eisini EM í fjør. Tað er tó fyrstu ferð, at Spania vinnur U19-HM.

Vertirnir Kroatia endaðu við bronsuheiðursmerkjum eftir longda leiktíð móti Egyptalandi. Føroyar taptu fyri Noreg og endaðu á 8. pláss: Føroyar - nummar átta í heiminum í hesum aldursbólkinum. Tað ljóðar framúrskarandi flott, og tað er tað eisini, tá man hugsar um, hvørjum vit eru uppi ímóti. Tó irðar man seg í føroysku leguni um, at tað júst ikki rakk til hálvfinalupláss og møguliga HM-heiðursmerki.

Sí eisini: U19: Endaðu á 9.plássi í HM-endaspælinum


Hjá Óla Mittún og liðfeløgunum sveið tað ótrúliga nógv at missa sigurin móti Egyptalandi í fjórðingsfinalunum (Mynd: Egin Tollaksson Kass)

Talan hevur tó verið um stóra kapping hjá føroyska liðnum, sum basti millum annað Svøríki og Týsklandi á vegnum. Ikki óvæntað gekk Óli Mittún á odda. Hoyvíkingurin skoraði ávíkavist 17 og 13 mál í omanfyrinevndu dystunum, og hann gjørdist eisini toppskjútti í allari kappingini við heili 87 málum í átta dystum.

Sí eisini: Óli Mittún: Hetta er næstan óbeskriviligt

Óli hevði harvið beint undir 11 mál í miðal, og sambært Handballstatz legði føroyski bakspælarin upp til allarflest mál í kappingini. Hann gjørdist eisini toppskjútti, umframt MVP (Mest virðismikli spælari) í EM-endaspælinum fyri U18-lið í fjør.

Hesa ferð fekk ein dani heiðurin, men Óli Mittún kom á All Star-liðið, ið varð kosið eftir kappingina. Sävehof spælarin varð valdur til besta spælskipara í HM-endaspælinum.

All Star-liðið: