Óli var ótrúligur í evropeiskum stórsigri

Bæði føroyingafeløgini í European League hava framvegis fult stigatal, nú bert eitt umfar restar í, í bólkaspælinum í næststerkastu kappingini fyri lið hjá EHF.

Tað var serliga IK Sävehof, sum gjørdi bart í gjárkvøldið, og ein spælari skein meira enn hinir í Partille í gjár. Talan var um 18-ára gamla hoyvíkingin í hópinum, sum sambært Sävehof-fjepparum "er ein fragd at síggja".

Tað er ei undur í, tí Óli Mittún skoraði heili 13 mál móti spanska Cuenca í 40-27 sigrinum. Føroyski bakspælarin rúnarbant við sínum spæli, gjørdist greiður toppskjútti í dystinum og varð eisini kosin dagsins spælari. Hetta er ikki fyrstu ferð í ár, at Óli hevur megnað alt hetta í einum evropeiskum dysti. Oddaliðið í svensku deildini hevur fult stigatal eftir fimm umfør í European League og hevur vunnið bólkin.

Óli Mittún heiðraður sum dagins maður eftir flott avrik í Partille (Mynd: IK Sävehof)

Støðan í bólkinum (Mynd: IK Sävehof)

Tað er sama støða hjá Füchse Berlin, sum í gjárkvøldið vann við fimm málum í Fraklandi, har millum annað Mathias Gidsel fekk frí.

Hákun West av Teigum er eykamaður fyri Hans Lindberg. Í gjár fekk 21-ára gamli hoyvíkingurin tó nógva spælitíð, og var hann - eins og í undanfarnu evropeisku dystum - effektivur. Hákun hevði trý skot av høgra vongi móti Chambrey Savoie og skoraði uppá øll trý.

Füchse Berlin kappast heilt frammi í oddinum í Bundesliguni og hevur sjey dystir á skránni fyri jól.