Páll skoraði aftur fýra mál í 1. umfari

Trýfaldu føroyameistararnir fingu eina góða byrjan uppá kappingarbyrjan, tá FM- favorittarnir vunnu stórt á ÍF á heimavølli. Fuglfirðingarnir komu beinanvegin í trupulleikar, tá Páll Andrasson Klettskarð skoraði tvey mál, ið vóru so siga heilt eins: Góð og hørð hornaspørk úr høgru frá Árna Frederiksberg har Páll við fremru stong stýrdi bóltinum flott í longra málhornið.

Hetta var ikki einastu ferðirnar í fyrra hálvleiki, at Páll Klettskarð rann seg frían. 33-ára gamli áleyparin fluktaði tvær ferðir væl - einaferð beint framvið og einaferð á stongina. Jákup Nolsøe Olsen stjórbjargaði einaferð, tá Páll stútaði, men í 2. hálvleiki eydnaðist aftur áleyparanum at skora tvey mál.

Tað fyrra var eftir returbólt, har nummar 9 var heilt til reiðar. Hann støgaði tó ikki við hattrikki: Eftir gott innlegg frá Jóannes Kalsø Danielsen úr høgru stútaði Páll bóltin aftur í longramálhornið - hesaferð tó úr stóru fjarstøðu.

Páll Andrasson Klettskarð sló til fýra ferðir móti ÍF í gjár - hann skoraði eisini í stórsteypadystinum móti HB (Savnsmynd: Sverri Egholm) 

Í samstarvi við dystir.fo - fleiri smálutir her

Les meira um dystin her: Flúgvandi føroyameistarar móti ÍF

Málini og annað frá dystinum síggjast HER

Hetta er annað árið á rað, at KÍ byrjar við stórsigri á heimavølli í fyrra umfari, har Páll Klettskarð skorar fýra mál. Í fjør var tað TB, ið tað gekk útyvir. Tá endaði tað 7-1. 

Páll Klettskarð skoraði samanlagt 18 mál í 2023, har hann var nógv skaðadarvaður mitt í kappingarárinum. Sambært FaroeSoccer hevur royndi áleyparin nú 187 mál í Betrideildini. Tað er næstflest samanlagt - bert Klæmint Andrasson Olsen hevur fleiri (231 mál).

Júst Klæmint er frammanfyri Páll í landsliðsrøðini, og Håkan Ericson ynskir sum útgangsstøði ikki at hava meira enn ein "veruligan 9'ara/boksspælara" í hópinum. Hetta staðfesti landsliðvenjarin aftur fyrrapartin eftir landsliðsúttøkuna, har Páll Andrasson Klettskarð, sum hevur spælt 13 landsdystir og bert ein síðani 2017, heldur ikki var á listanum.

Sviin segði eisini við KVF, at hann kendi, at hann endurtók seg: Avrikini hjá Pálli við KÍ eru flott, men í útsagnunum á FM1 bendi tað eisini, at tað telur eitt sindur ímóti honum, at hann spælir við júst KÍ: Talan er um eitt oddalið, nógvir góðir bóltar koma inn frá millum annað Árna Frederiksberg, og at spælistílurin ikki líkist tí á landsliðnum. 

Sí eisini: Ikki so nógv nýtt í landsliðshópinum