Rasmus og Fróði skulu venja U17-landsliðið hjá dreingjum - fleiri broytingar á ungdómslandsliðunum

Fýra lið hava fingið nýggjan høvuðsvenjara. U17-landsliðið við dreingjum hevur nú 35-ára gamla Rasmus Nolsøe sum oddamann. Hann hevur veirð hjálparvenjari hjá HB síðani 2017 og hevur eisini royndir sum venjari í ungdómsdeildunum. Hansara hjálparmaður er ikki hvør sum helst: 42-ára gamli Fróði Benjaminsen, ið hevur metið fyri flest A-landsdystir (94) og yvir 500 dystir í fremstu føroysku røð.


Fróði Benjaminsen er ikki óvanir við at umboða Føroyar í altjóða dystum - her á veg inn á vøllin til dystin móti Grikkalandi í juni 2015

Áki Johansen hevur í nógv ár staðið á odda fyri U17-landsliðnum. Nú skal hann hava U19 og U18 dreingir - U18 er ein nýggjur aldursbólkur, ið Føroyar fara at kappast í. Hjálparvenjarin Jens Kristian Hansen fylgir við. Jógvan Martin Olsen hevur seinastu trý árini havt ábyrgdina av U19 dreingjum. Hann er framvegis í starvi sum fótbóltsmennir hjá FSF, men fer nú ikki at hav aábyrgd fyri nøkrum landsliði.
 
Á genutsíðuni flytir eisini ein venjari ein árgang upp - Pauli Poulsen fer frá U15-landsliðnum við gentum til U17. Har hevur Øssur Hansen verið venjari, men hann er nú ikki longur í starvi í FSF. Á U15-landsliðnum er tað fyrrverandi landsliðsleikarin Christian Høgni Jacobsen, sum tekur við. Hann er í løtuni høvuðsungdómsvenjari hjá NSÍ. 


Ungdómslandsliðsvenjarar 2020