Ruben Amorim verður nýggjur venjari hjá Manchester United

Mánadagin segði Manchester United, eftir nógvar gitingar og nógv trýst, niðurlendingin Erik ten Hag úr starvi. Síðani gekk skjótt.

Sí eisini: van Nistelrooy tekur fyribils yvir í United

Skjótt vóru álítandi søgur frammi um, at Rúben Amorim var greitt fyrsta val hjá nýggju ítróttarligu leiðsluni í Manchester United. 

Hetta hevur fylt heilt nógv í fótbóltsheiminum hesa vikuna, og í gjár varð tað sum so endaliga váttað.

Væntað verður at Rúben Amorim verður kunngjørdur sum nýggjur Manchester United-venjari nú seinnapartin, og at hann tekur við eftir landsliðssteðgin í november. Hetta tí at har ein uppsagnartíð í portugisiska stórfelagnum.

Sky Sports, Fabrizio Romano og onnur skriva, at Manchester United skal gjalda beint yvir 75 milliónir krónur (10 milliónir evrir ella líka yvir tað) fyri 39-ára gamla portugisan og fimm av hansara núverandi Sporting-toymi.

Ruben Amorim fer eftir øllum at døma at takka Sporting áskoðarunum fyri tíðina skjótt (Mynd: EPA)

Ruben Amorim var høgt á listanum hjá Liverpool, tá avloysarin hjá Jürgen Klopp skuldi finnast. Hann verður mettur at vera  mest evnaríki venjarin úr Portugal síðani Jose Mourinho. Hann kom eisini til Onglands um 40-ára aldur.

Stutt eftir at hann steðgaði sum spælari í 2017, fekk Amorim starvið hjá Braga. Í 2020 tók hann við Sporting CP og hevur síðani leitt høvuðsstaðarfelagið til tvey meistaraheitið - Sporting er eisini nummar eitt í Portugal løtuni og í Champions League-bólkaspækinum. Venjarin eigur eisini trý steypagull í heimlandinum.

Skjótt skal Amorim royna at fáa Manchester United á beint aftur. Eftir níggju umfør liggur stórfelagið nummar 14 í Premier League og hevur ikki vunnið nakran av teimum trimum Europea League-dystunum. Hann verður sætti fastsetti venjarin hjá United eftir Sir Alex Ferguson - eingin hevur megnað at lyft arvin eftir hann.

Nakrir fyribils venjarar hava eisini verið síðani. Tann seinasti er fyrrverandi áleypari felagsins, Ruud van Nistelrooy, sum í gjárkvøldið vann 5-2 á Leicester í Carabao Cup. van Nistelrooy fer helst úr felagnum, tá Amorim vantandi kemur um eini tríggjar vikur. Til tá stendur niðurlendingurin við róðrið á Old Trafford.