Sarah Mahfoud roynir aftur at fáa ein HM-dyst

Tá Sarah Mahfoud í apríl boksaði móti núverandi WBC-heimsmeistaranum, Skye Nicholson í Las Vegas, misti hon eisini møguleikan fyri at endurvinna eitt HM-belti.

Men hóast vónbrotið hevur vestmannakvinnan við bústaði í Danmark framvegis ætlanir um at boksa seg til ein stórdyst aftur.

Fyrsta stig á hesi leið er í Royal Arena á Amager, tá boksistevnan Danish Fight Night er á skránni.

- Hugurin til nevaleik og serligi neistin, ið er neyðugur, eru við at venda aftur. Eg havi fingið eitt sterkt lið av hjálparum til fyrireikingarnar, sum hesaferð verða eitt sindur øðrvísi enn tær fyrr hava verið.

- Eg liggi framvegis ovarlaga hjá fleiri av HM-sambondunum, so eg eri avgjørt ikki liðug enn. Tað hevði ikki verið rætt at støðga nú eftir ósigurin í Las Vegas, tá eg veit, at eg havi meira at geva. Nú skal eg bara geva meg fult út í venjingarhølinum, og so megna at boksa ein góðan dyst 12. oktober, sigur Sarah Mahfoud, ið júst er vend aftur til Danmarkar eftir m.a. at hava verið við til at halda ólavsøku í Føroyum saman við vinum og familju.

Dansk-føroyski boksarin var IBF-heimsmeistari frá 2020 til 2022, og roynir nú at fáa ein HM-dyst í fjøðurvekt í einum at veimum stóru HM-samgongunum. Amanda Serrano hevur sitið tungt á hesum vektflokkinum seinastu árini, men broytingar eru nú á veg.

Skye Nicholson situr á trónuni hjá WBC, og so er IBF-heitið júst latið leyst, tí Amanda Serrano ikki megnaði at verja heitið innan fyri ásettu tíðarfreistina.

Sambært týskum miðlum, er Nina Meinke, sum Sarah Mahfoud fyrr hevur vunnið á í HM-dysti, nú innstillað til at boksa um heitið.

Amanda Serrano er framvegis heimsmeistari hjá WBA og WBO, men skal í november boksa HM-dyst í super-lættvekg móti Katie Taylor, og harvið er ógreitt hvat hendir eftir tað.

Vinnur hon heitið, fer t.d. WBO helst at seta krøv um, at hon innan tvær vikur skal gera av, hvønn av teimum báðum vektflokkunum, hon framhaldandi vil vera heimsmeistari í.

Sarah Mahfoud er í løtuni styrkismett sum nummar 2 hjá WBO, nummar 1 hjá WBC og nummar 6 hjá IBF. Saman við øðrum bíðar hon eftir at fáa møguleikan til ein dyst um eitt heiti, serliga um tað eydnast henni at vinna dystin í Royal Arena 12. oktober.

Enn er ikki upplýst, hvørjum Sarah Mahfoud skal møta á Danis Fight Night í Royal Arena.