![placeholder](https://roysni.fo/css/img/banner2x1.png)
Dómadagur í Dortmund. Dreymurin hjá Niðurlondum ella Onglandi um evropameistaraheitið 2024 brestir í kvøld. Fyrrnevnda vann EM í júst hesum landinum í 1988. Fótbólts móðurland var á fyrsta sinni umboðað í einari EM-finalu fyri trimum árum síðani, men brotsspørk vórðu - sum so ofta fyrr - ein marra fyri onglendingar.
Tí er tað kanska lagnunnar speisemi, at Ongland sendi Sveis út úr fjórðingsfinaluni við júst brotsspørkum seinast, og at liðið hjá Southgate nú sær út til at standa so sterkt, um ein dystur skal avgerast við tvídysti úr ellivu metrum.
Tað skal kvøldsins hálvfinala møguliga. Veddingarfyritøkur og viðmerkjarar hava ilt við at taka dagar ímillum Niðurlond og Ongland, og síðstnevnda lið er endað í longdari leiktíð og/ella brotssparkskapping tveir dystir á rað.
Liðið hjá Ronald Koeman hevur hinvegin vunnið greitt á Rumenia og síðani vent tí í vanligari leiktíð móti Turkalandi. Flott avrik á hvør sín hátt, men nú hækkar styrkin í mótsstøðuliðið munandi. Niðurlond endaðu eisini nummar trý í sínum bólki.
Gakpo og Van Dijk eru tveir teir størstu profilarnir hjá Niðurlondum, og kenna Liverpool-spælararnir Premier League væl (Mynd: EPA)
Hjá teimum appelsinlittu hevur serliga Cody Gakpo staðið sterkur í myndini. Liverpool-spælarin er javnsettur toppskjútti í endaspælinum við trimum málum, og átti Gakpo eisini sín stóra leiklut í tí, sum varð eitt sjálvmál og avgjørdi fjórðingsfinaluna.
Ongland skal fáa sínar álopskendu spælarar sum Foden, Bellingham og Kane at eydnast betri í dag. Við nýggjari leikskipan móti Sveis í fjórðingsfinaluni var tað frægari, og hetta er triðja hálvfinalan í fýra endaspølum undir Gareth Southgate, sum annars hevur verið hørðum atfinningum síðstu tíðina.
Bellingham tryggjaði fyri 10 døgum síðani Onglandi eitt "eyka lív" í EM. Nú skal Real Madrid-spælarin royna at skjóta sítt land í aðru EM-finaluna á rað (Mynd: EPA)
EM-hálvfinalurnar
Í dag, mikudagin 10. juli
20.00: Niðurlond - Ongland (Dortmund -sæst á TV2)
Í gjár, týsdagin 9. juli
Frakland - Spania 1-2 (1-2)
9' Randal Kolo Muani 0-1 (K. Mbappe)
21' Lamine Yamal 1-1
25' Dani Olmo 2-1
Sí eisini: Spania feldi Frakland og er í finaluni
Sí eisini: Yamal tók EM-metið
Vinarliga broyt tínar kennifíla - og privatlívsstillingar fyri at síggja hetta innihald