Sigfríður og Fróði settir í starv sum fótbóltsmennarar

Fótbóltssamband Føroya søkti undan jólum eftir tveimum nýggjum fótbóltsmennarum. Heimasíðan hjá FSF skrivar nú, at eftir nogvar góðar umsóknir komu inn, og samrøður hava verið, er valið fallið á Sigfríð Skaale Clementsen og Fróða Benjaminsen.

Sigfríður Clementsen er settur í fulltíðarstarv. 47-ára gamli havnarmaðurin hevur hesa øldina verið sera virkin sum venjari í føroyskum feløgum. Hann hevur ført B36 og EB/Streym til FM, og Víking til Løgmanssteypið trý ár á rað. Sigrfríður var venjari, tá B36 á fyrsta sinni spældi seg víðari í evropeiskari kappinging, og eitt føroyskt lið fyrstu ferð kom víðari í Champions League (2006). Hann førdi Víking víðari í Evropa tríggjar ferðir - eisini fyrstu ferð í søgu felagsins (2013) -  í 2014 kom liðið tvær ferðir víðari í Europa League, sum tað fyrsta føroyska liðið nakrantíð. Sigfríður var í fjør venjari á Fótbóltsakademiinum í Vági, umframt høvuðsvenjari hjá besta mansliðnum hjá FC Suðuroy.

Sigfríður Clementsen hevur fyri stóran part arbeitt við vaksnamannaleikarum. Seinast hann var í Betrideildini var í 2018, tá hann aftur stóð á odda fyri Vìking (Mynd: Sverri Egholm) 

42-ára gamli Fróða Benjaminsen hevur spælt beint undir 600 dystir á hægsta stigi í Føroyum (503 í Betrideildini - 88 í steypakappingini) Miðvallarin hevur 39 evropeiskar dystir fyri fimm ymisk feløg og 94 A-landsdystir fyri Føroyar. Harvið er hann ein metmaður og jarnmaður á øllum økjum, og nú hann er við at stilla gaggurnar á hillina, fer Fróði at arbeiða nógv við menning í føroyskum fótbólti. Í januar varð fyrrverandi liðformaðurin á A-landsliðnum settur sum hjálparvenjari hjá U17-landsliðnum við dreingjum, og nú fer toftamaðurin at arbeiða hálva tíð sum fótbóltsmennari. 

Frammanundan eru Jógvan Martin Olsen og Eli Hentze, nýggjur hjálparvenjari á A-landsliðnum, eisini knýttir at FSF sum fótbóltsmennarar. FSF lýsir høvuðsuppgávurnar hjá fótbóltsmennarunum at vera at veita feløgunum eina hjálpandi og mennandi hond í samband við menning av okkara ungu spælarum, umframt at taka sær av Úrvalstilboðnum, sum millum annað verður bjóðað næmingum, ið ganga á Miðnám.