StÍF spældi seg í fjórðingsfinaluna

Síðsti dysturin í grundspælinum í SMS-deildini var á skránni í gjárkvøldið. VB tók ímóti StÍF - talan var um avgerandi dyst, tí liðið sum dró longsta stráðið fór avstað við seinasta fjórðingsfinaluplássinum.

Útiliðið skuldi vinna og var eisini greitt omaná fyrra partin av fyrra hálvleiki: Tá hálvrunnið var, var munurin fimm mál. VB kom betur við, sum hálvleikurin leið. Í steðginum vóru tvey mál á muni, og heimaliðið hekk í restina av vegnum.

Tá tíggju minuttir restaðu í, var støðan 23-24. StÍF tók leikbrá og skoraði síðani trý mál á rað - Emmy Ingibjørg Kass skoraði tvey teirra og toppskjúttin Rebekka Justinussen hitt. Annars vóru tað fleiri heilt ungar, sum stóðu seg væl hjá StÍF: Eyðbjørg Kallsberg, Marita Magnadóttir og Maria Mrdalo skoraðu samanlagt 14 mál í lyklasigrinum.

StÍF vann gysaran í Vági og tryggjaði sær í minsta lagi ein dyst í endaspælinum (Mynd: StÍF)

Fýra mál á muni og fýra og ein hálvur minuttir eftir. Heimaliðið gav tók ikki upp.  VB skuldi "bert" fáa javnleik og skoraði tvey mál á rað - sjálvt um dómaraseðilin sigur, at talan var um trý mál. StÍF helt tó høvdið kalt og vann sær rættin at spæla fjórðingsfinalu. Tað eru úrslitini í innanhýsis dystunum móti júst VB (tveir sigrar og ein javnleikur), ið gjørdust avgerandi.

At StÍF av álvara fær bjóða Neistan av í fjórðingsfinaluni um tíggju dagar, er ósannlíkt. Tó merkir tað helst nógv fyri felagið av vestara armi á Skálafjørðinum, at liðið er við millum tey síðstu, og alt kann henda í hesum einstøku uppgerðunum. Stjørnan og VÍF hittast í hinari fjórðingsfinaluni. kappingarárið hjá VB og EB er av.

SMS-deildin, síðsta umfar
Í gjár, mikudagin 5. apríl

VB - StÍF 25-27 (14-16)

Toppskjúttar: 
VB: Bára Krosslá Mortensen 9 mál og Erna Pajić 8 mál
StÍF: Rebekka Justinussen 6 mál, Eyðbjørg Kallsberg og Marita Magnadóttir 5 mál

Sí dómaraseðilin her (Her er ein feilskráseting móti endanum av dystinum, har VB stendur til at hava skorað tvær ferðir innan tólv sekund  - 58.48 og 59.00 - talan var bert um eitt mál, og klokkan í høllini vísti eisini 25-27, tá hon floytaði)

Rættað og dagført: 10.30

Fjórðingsfinalurnar:
Leygardagin 15. apríl
Stjørnan - VÍF

Sunnudagin 16. apríl
Neistin - StÍF

Vinnararnir koma víðari til hálvfinalurnar. H71 og Kyndil hava spælt seg í har.

Endaliga úrslitið í grundspælinum

Støðan	Dystir	Vunnin mál	Tapt mál	Munur	Stig
H71	21	772	538	234	41
KYNDIL	21	656	493	163	32
NEISTIN	21	624	516	108	30
STJØRNAN	21	607	573	34	24
VÍF	21	592	580	12	22
STÍF	21	484	673	-189	7
VB	21	440	629	-189	6
EB	21	491	664	-173	6

Talva og tøl: Hondbóltssamband Føroya