Stjørnuleikarar møguliga ikki við móti Føroyum orsaka av coronavirusinum

Christian Eriksen, Simon Kjær og Andreas Cornelius spæla allir í Norðuritalia. DBU heldur eyga við støðuni, og høvuðslæknin fer í komandi vikunum at tosa við leikararnar.

Christian Eriksen verður her fagnaður eftir eitt av sínum mongu landsliðsmálum. Tað e ivasamt, um hann verður at síggja á vøllinum móti Føroyum 27. mars og móti Onglandi á Wembley nakrar dagar seinni (Mynd: EPA)

2020-03-05 13:43

Agnar Prestá

27.mars spæla Føroyar og Danmark venjingardyst í Herning. Tríggjar dagar seinni skal Danmark spæla á Wembley móti Ongland.

Nú er greitt, at DBU heldur eyga við støðuni viðvíkjandi teimum trimum leikarunum, sum til dagliga spæla í Norðuritalia, ið er hart rakt av coronavirusinum. Tvær av allarstørstu stjørnunum á danska landsliðnum seinastu árini, miðvallarin Christian Eriksen og liðformaðurin Simon Kjær spæla báðir í Milano í Lombardia, fyri ávíkavist Inter og AC Milan.

Áleyparin Andreas Cornelius spælir við Parma, sum liggur í Emilia-Romagna. Saman við Lombardia er tað eitt av fýra økinum, sum danska uttanríksráðið hevur mælt frá at ferðast til, og øll sum hava verið í økinum og koma til Danmarkar skulu síðani vera í karantenu í 14 dagar.

Les eisini: Latið vera við at fara óneyðugar ferðir til Norðuritalia

Spurningurin er, um støðan er broytt um smáar tríggjar vikur, tá danski hópurin samlast. Tað er eingin ivi um, at um Cornelius, Eriksen og Kjær halda seg skaðafríar, so verða teir úttiknir seinni í mánaðinum.

- Beint nú er tað so, at nógv kann broyta seg frá degi til dags, so tað er ov tíðliga at siga, júst hvat vit fara at gera. Tað vit kenna hópin, og tá eg havi tosað við einstøku leikararnar, hyggja vit uppá, hvat støðan er júst. Eisini fyri at hoyra hvat hvørt einsktak felag ger.

Hetta sigur høvuðslæknin hjá DBU, Morten Boesen, við Politikken.

Í gjár kunngjørdi forsetin í Italia, at øll ítróttartiltøk í landinum verða uttan áskoðarar komandi mánaðin. Hetta ávirkar sjálvsagt Seriu A, har teir tríggir donsku landsliðsleikararnir spæla.

Jens Stryger Larsen (Udinese), Lasse Schöne, Peter Ankersen og Lukas Lerager (Genoa) spæla eisini í bestu italiensku deildini. Teir eru eisini fastir landsliðsleikarar, og sambært DR kann teirra luttøka í komandi venjingardystum eisini koma í vanda orsaka av Coronavirusinum.

Vinarliga broyt tínar kennifíla - og privatlívsstillingar fyri at síggja hetta innihald