Agnar Prestá
Í dag og í morgin spæla liðini, sum skulu spæla hálvfinalu í FA Cup í vikuskiftinum sínar dystir í 32. umfari í Premier League. Umframt hetta spæla Tottenham og Crystal Palace London-uppgerð á nýggja leikvøllinum hjá Tottenham, sum endiliga er klárur.
Í kvøld (02.04):
19.45: Watford - Fulham
Wolves - Manchester United (TV3+/Viaplay)
Í morgin (03.04):
19.45: Chelsea - Brighton
Manchester City - Cardiff (TV3 MAX/Viaplay)
Tottenham - Crystal Palace (6'eren/Viaplay)
Í kvøld er mest fokus á Manchester United, ið hevur torføra uppgávu á útivølli móti Wolves. Úlvarnir hava havt eitt gott kappingarár, og teir hava serliga gjørt vart við seg móti topp-seks liðum. Uppflytararnir fingu javnleik á Old Trafford í heyst, og beint undan landsliðssteðginum varð liðið hjá Solskjær sligið út av FA Cup á Molineux. Í kvøld skal stórfelagið royna at løna Wolves ósigur aftur og taka 3. plássið, sum Arsenal kom uppá í gjár. Talan er um eit ógvuliga tætt stríð um Champions League-plássini, har trý stig eru ímillum nummar 3 og nummar 6 (Chelsea) United er á 4. plássi, og fekk trý stig móti Watford leygardagin, men tað var eftir eitt minni gott avrik.
Júst Watford tekur ímóti Fulham í kvøld, og kann við einum sigri senda uppflytararnar niður aftur í The Championship. Fulham hevur havt eitt ógvuliga trupult kappingarár, og sjálvt um liðið ikki tapur í kvøld, so er tað bara ein spurningur um tíð, áðrenn niðurflytingin er veruleiki. Watford kappast við millum onnur Wolves, um at enda ovast av liðunum uttanfyri topp-seks.
Vinarliga broyt tínar kennifíla - og privatlívsstillingar fyri at síggja hetta innihald