U19-genturnar endaðu á triðja plássi

- Fyri okkara viðkomandi var hetta ein góð kapping, har vit royndu at trýsta mótstøðuliðini langt frammi á vøllinum. At tað so kostar í verjustøðu, er prísurin, sum vit mugu gjalda. Sjálvandi fara vit á vøllin fyri at vinna – tað gera vit altíð, líkamikið hvørjum vit møta – og tann hugburðin skulu vit altíð hava. Men tá tað er sagt, so er tað ikki altíð tað viktigasta.

Soleiðis tekur Sigtór Petersen samanum Baltic Cup í Estlandi í viðmerking til fsf.fo.. Hann er høvuðsvenjari hjá U19-landsliðnum við gentum, sum farnu dagarnar hevur tikið lut í kappingini.

Føroyar spældu tveir tættar dystir og tapti ein stórt: Føroyar vunnu 1-0 á Litava við máli, sum Fríða Magnusardóttir Jakobsen skoraði. Síðani tapti føroyska liðið 1-0 fyri Lettlandi og at enda 5-0 fyri estisku vertunum.  

– Tapið fyri Estlandi var nógv merkt av møði. Fyri onkrar av gentunum var hetta triðji dysturin í fimm dagar, og tað sást aftur á vøllinum. Men avrikið og innsatsurin var góður, og sum heild eru vit nøgd við tað, sum vit sóu hesar dagarnar, sigur Sigtór Petersen.

Næst á skránni hjá U19 gentunum er EM-undankappingin, sum verður í Serbia frá 25. november til 4. desember. Føroyar eru í bólki 5 í deild A. Hetta saman við Serbia, Eysturríki og Kekkia, skrivar heimasíðan hjá Fótbóltssambandinum.

Mynd: fsf.fo