U21: Ukrainar eru á vitjan

Tað verður talan um ein serstakan dyst, tá U21-landsliðið hjá krígsherjaða landinum spælir í Føroyum í kvøld.

– Umframt at vera eitt fantastiskt spæl har vit dystast um stigini, so hevur fótbóltur eisini eina savnandi megi, sum vit sjálvandi ynskja at brúka í hesum førinum, sigur Virgar Hvidbro, aðalskrivari við heimasíðuna hjá Fótbóltssambandinum.

Í samband við dystin á Tórsvølli vil FSF og U21 landsliðið nýta høvið til at vísa samhuga við ukrainska fólkinum, og áskoðarainntøkurnar fyri dystin verða latnar Reyða krossi til hjálpararbeiðið hjá felagsskapinum í samband við kríggið í Ukraina - ukreinar í Føroyum eru eisini bodnir til dystin.

Støðan í bólkinum er tann, at Ukreina er á 2. plássi, ið gevur atgongd til play-off dyst, um at sleppa til EM. Orsakað av krígsstøðuni hevur liðið spælt tveir dystir færri enn Føroyar, ið eru fýra stig aftanfyri.

Eftir flotta føroyska sigurin í Norðurmakedónia síðst í mars sást ein møguleiki fyri einum 2. plássi, tí tá var støðan hjá ukreinska liðnum ógvuliga ivasamt. Liðið heldur tó fram og hevur fýra dystir eftir. 

Sámal Erik Hentze til venjingina mánadagin (Mynd: Bjarni Enghamar/FSF)

Um Føroyar framvegis skulu hava ein veruligan møguleika at fáa 2. plássið krevst ein sigur í kvøld, og hóast hendan stóra uppgávan skuldi verið loyst, er víðari luttøka framvegis ógvuliga ósannlík. 

Liðið hjá Sámal Erik Hentze kann tó næstu vikuna javnað, ella fara framvið, U21-metinum frá undankappingini til EM 2011, sum er 11 stig.

Fyrsta bríksl á Tórsvølli í kvøld verður klokkan 18. Dysturin sæst hjá Televarpinum. FM1 hevur beinleiðis frásøgn - vit hava beinleiðis dagføring á forsíðuni, myndir frá dystinum og annað.