UEFA: - Eingin hevur sett ynski fram um at útseta EM

Coronavirusið hevur gjørt sítt inntriv í Evropa og í fótbóltsheiminum, og tað hevur fingið nógv at seta spurnartekin við, um EM hjá monnum í fótbólti kann fara fram eftir ætlan í summar.

Í gjár gingu søgur um, at fleiri fótbóltssambond høvdu biðið UEFA útseta stóru kappingina. Tað, at endin av kappingarárinum í fleiri evropeisku deildunum helst verður ávirkaður av virusinum, gjørdi eisini sítt til, at miðlar tóku søguna upp.

UEFA hevur í dag avsanna søgurnar, og sagt at einki hald er í teimum – evropeiska fótbóltsamgongan hevur ikki fingið nakra fráboðan ella ynski um, at EM skal flytast.

UEFA staðfestir í tíðindaskrivi, at støðan verður tikin í størsta álvara, og at vakið eyga verður hildið við henni. UEFA samskiftir eisini javnan við Heimsheilsustovnin (WHO) og myndugleikarnar í ymsu londunum um Covid-19.

Í gjár kom aftur fram, at møguleiki er fyri, at olympisku leikirnir í Tokyo, møguliga ikki verða hildnir í summar eftir ætlan.

Í kvøld spæla PSG og Borussia Dortmund uttan áskoðarar í París. Nakrir av dystunum í Europa League í morgin verða leiktir við tómum áskoðaraplássum, og dystirnir Milan - Getafe og Sevilla - Roma eru útsettir. Spanska felagið ynksti ikki at fara til Lombardíi í Italia, ið økið ið er harðast rakt av coronavirusinum. Roma-ferðalagið fór heldur ikki Spania. Mynugleikarnar í Sevilla vildu ikki loyva tí - Spania hevur steðgað allari flúgving til og frá Italia.