Agnar Prestá
Spenningurin um meistaraheitið í Premier League hevur so at siga ikki verið har í 2020. Liverpool hevur verið suverent og tryggjaði sær endaliga meistaraheitið síðst í juni.
Í botninum sær tað sera tungt út hjá Aston Villa og Bournemouth, hóast bæði liðini vunnu í vikuskiftinum og hava ein møguleika enn. Norwich er longu farið niður.
Allarstørsti spenningurin í bestu ensku deildini í løtuni er um tey seinastu topp-fýra plássini, ið geva atgongd til Champions League-pláss komandi árini. Støðan har broyttist í vikuskiftinum, tá bæði Chelsea og Leicester óvæntað taptu - ávíkavist 0-3 móti Sheffield United og 1-4 móti Bournemouth - og eisini fyrr í dag, tá tað gjørdist greitt, at Manchester City kortini sleppur at spæla Champions League-fótbólt komandi árini.
Harvið eru tað trý lið, ið veruliga eru við í stríðnum um tvey tey seinastu plássini:
3. Chelsea (60 stig)
4. Leicester (59 stig)
5. Manchester United (58 stig) *
*Ein dyst færri
Wolves hevur 55 stig og Sheffield United 54 stig, og hesi liðini eru harvið ikki heilt úti enn, nú trý umfør eru eftir.
Seinasti dysturin í 35. og fjórðseinasta umfarinum verður leiktur á Old Trafford í kvøld. Har er Manchester United stórfavorittur móti Southampton.
United hevur seinastu fýra Premier League dystirnar skora minst trý mál (14 mál samanlagt) og vunnið við trimum málum í øllum. Hetta seinni er met í Premier League. Spælið hevur verið undirhaldandi: Flótandi, skjótt og málskøkið. Matic og Pogba sær aftur út sum ein krútsterkur sentralur miðvøllur og beint frammanfyri bindur Bruno Fernandes spælið frálíka væl saman, og so eru tað vandamiklu rakettirnar: Greenwood, Rashford og Martial.
Um hetta kann halda fram er ivasamt, men fyri United hevur tað era nógv at siga at koma í Champions League aftur. Trý stig í kvøld merkja, at United kemur upp á 3. plássi við sigri. Verður tað ikki tað, er liðið aftur undir stórum trýsti.
Vinarliga broyt tínar kennifíla - og privatlívsstillingar fyri at síggja hetta innihald