Fótbóltur

Video: - Skulu spæla við sama stríðsvilja sum móti Danmark

- Eitt slíkt úrslit hevði staðið leingi eftir, og og eg hevði ikki trúð, at tað bar til at fáa slíkan stemning á einum føroyskum leikvølli, sigur leirvíkingurin um upplivingina leygardagin - nú skulu ting takast við inn til dystin í morgin móti Moldova.

2021-09-06 14:07 Author image
Agnar Prestá
placeholder

- Javnleikur móti Danmark hevði verið eitt úrslit, sum hevði staðið eftir leingi í føroyskum fótbólti, so tað var eitt skuffilsi, ið man stóð eftir við.

Soleiðis segði Sølvi Vatnhamar, undan venjing í dag, um 1-0 ósigurin móti Danmark. Upplivilsi og stemningurin leygarkvøldið var nakað heilt serligt, sigur leirvíkingurin:

- Tað var heilt fantastiskt og stuttligt at vera partur av. Skansin gekk á odda, var framúr og fekk øll við. Eg trúði ikki, at man kundi fáa ein slíknan stemning á einum stadion - ikki nakað øðrvísi í mun til at spæla til dømis í Portugal. Tað ber okkum heilt sikkurt fram - við einum slíkum "boosti" er sensatiónin ikki lagt vekk.

Nú er fokus á Moldova, har fleiri ting skulu finnast fram fyri at tað skal eydnast hjá føroyska liðnum.

- Undan undankappingini sóu vit hetta sum okkara besta møguleika at fáa stig, men Moldova er eisini í einari menning. So tað krevur, at vit vísa sama innsats og stríðsvilja sum móti Danmark, og finna líknandi álopskent spæl fram, sum vit vístu í venjingardystunum í juni (móti Íslandi og Liktinstein). Vit hava havt eina heldur harða viku, og nógv skal spæla saman, men vit eiga tað í okkum, sigur 35-ára gamli Sølvi Vatnhamar, ið følir seg til reiðar til ein triðja dyst - um tað verður til 90 minuttir, fáa vit at síggja í morgin.

Fyrsta bríks verður klokkan 19.45.

placeholder
placeholder