Viking Stavanger nærkast oddinum

Av tí at Alexander Blonz var við Norra til HM, vórðu summir dystir hjá Viking Stavenger fluttir. Liðið hjá Kjartani Johansen, Jónasi G. Djurhuus og Helga Hoydal leikti í gjárkvøldið útsettan dyst, og kom harvið uppá 18 dystir sum øll hini, og við sigrinum er Viking nú bert eitt stig frá playoff-plássi í næstbestu norsku deildini.

Viking Stavanger tók ímóti Oslo Studentenes Idretskklubb, ið liggur undir niðurflytingarstrikuni. Jónas G. Djurhuus skoraði fýra mál, og Kjartan Johansen skoraði tríggjar ferðir í 27-24 sigrinum. Í hálvleikinum var 10-10.

Felagið skrivar, at talan ikki var um tann flottasta hondbóltsdystin, men Viking Stavanger fekk tvey týdningarmikil stig og hevur nú 21 stig á 7. plássi. Tey fýra liðini beint omanfyri Viking hava øll 22 stig. Triðja plássið gevur rætt til upp- og niðurflytingardystir móti triðniðasta liðnum í bestu deildini. 

Leygardagin spæla Viking Stavanger týdningamiklan dyst á útivølli ímóti Sandefjord TIF. Bert eitt stig skilur hesi liðini. 

Helgi H. Hoydal situr framvegis uttanfyri, eftir at hann fekk tikið meniskin fyri einum mánaði síðani. Strikuspælarin er tó helst á vøllinum aftur innanfyri tær næstu vikurnar.