Zorniger fingið sekkin í Brøndby

Tað hevur verið nógv órógv rundanum Brøndby seinastu tíðina. Í seinastu flytingarvindøgunum hevur útskiftingin í hópinum verið stór, og úrslitini hetta kappingarárið hava ikki verið góð. Liðið varð varpað út av Europa League, og liggur heili 22 stig aftanfyri oddaliðið og arvafíggindan FCK í Superligaini. 

Í gjár tapti Brøndby í Esbjerg eftir eitt vánaligt avrik. Harvið yvirhálaðu uppflytararnir Brøndby og tóku 3. plássið. Liðið av Vestegnen er trýst av fleiri liðum í stríðnum um topp-seks, og komandi fýra dystirnir avgera, um teir í bláum og gulum yvirhøvur koma í "meistarabólkin"

Sjóneykan í donsku miðlunum hevur verið á venjaran, Alexander Zorniger, ið aftur í gjár kom í fokus eftir ein dyst. Hann hevði eitt heitt kjak við fyrrverandi landsliðsleikaran Stig Tøfting i sjónvarpsstovuni hjá TV3 Sport. Í desember kom hann at kjakast við nakrar áskoðarar hjá liðnum eftir sigurin á Vejle, og vikuna eftir skeldaðist týski venjarin við verjuleikaran Anthony Jung mitt á vøllinum eftir pínliga 3-2 tapið ímóti Vendsyssel á heimavølli.

Nú hevur leiðslan fingið nokk, og í morgun kunngjørdi Brøndby, at felagið hevur stegðað samstarvið við 51-ára gamli venjarin. Tað gekk ananrs væl seinasta kappingarár, har Brøndby gjørdist danskur steypavinnari fyri fyrstu ferð í 10 ár. Liðið megnaði tó ikki at tryggja sær fyrsta danska meistaraheiti síðani 2004. Brøndby blakaði alt á gólvið í Horsens, har liðið hjá Zorniger var á odda 2-0, tá smáir fimm minuttir restaðu í.

Tað er ikki víst enn, hvør kemur at taka yvir í Brøndby. Kasper Hjulmand, sum steðgar í FC Nordsjælland eftir kappingarárið, er útnenvndur til favoritt av fleiri, meaðn Micheal Laudrup eisini er eitt stórt navn. Á listanum hjá veddingarfyritøkunum gevur føroyski landsliðsvenjarin pengarnar 50 ferðir aftur, og tað er ógvuliga ósannlíkt at Lars Olsen, ið fyrr hevur umboðað felagið sum leikari, vendur aftur sum venjari nú.