- Gleði meg ógvuliga nógv til at spæla saman við Óla Mittún

Katowice, Pólland (Portalurin): Føroyar spældu heilt uttan sínar størstu profilar í dag - teir sum eru á A-landsliðnum eisini. Danir nýtti allarstørsta profilin Frederik Emil Pedersen í yvir 40 minuttir í álopinum og skiftu rímiliga nógv út í dystinum.

- Tað var ikki soleiðis, at tað var lív ella deyði. Man fór sjálvandi eftir at vinna, men bæði liðini vóru víðari, og hetta merktist serliga út á dystin.

Hetta sigur Frederik Emil Pedersen, sum Portalurin fekk orðið á eftir 41-32 sigurin hjá Danmark á Føroyum. Báðir partar viðurkendu, at dysturin ikki var so týðandi.

- Gleði meg til samstarvið við Óla

Frederik Emil helt fyri, at Føroyar sum so spældu við einari "B-ketu". Serliga við at "Oli ikki var med".

Júst Óla Mittún fer Frederik Emil Pedersen annars at læra heilt væl at kenna skjótt. Stutt eftir U21 HM gerast teir liðfelagar í GOG, har danin longu hevur gjørt vart við seg.

- Eg gleði meg ógvuliga nógv, staðfestir danski spælskiparin, tá vit nevna komandi samstarvið.

- Hann er jú ein ótrúliga dugnaligur og spennandi spælari. Eg eri eisini vísur í, at vit kunnu læra nógv av hvørjum øðrum.

Danir taka ein dyst í senn - vónar at Føroyar fara heilt langt

Tá vit spyrja um føroyska spælið og framtíðarvónirnar í kappingini, nú fjórðinsfinalan nærkast, var Frederik Emil Pedersen greiður: 

- Hetta er eitt ógvuliga spennandi lið, og eg vóni í roynd og veru, at teir koma heilt langt hesa vikuna.

Sí eisini: Danskur viðmerkjari: - Tað er jú vilt at Føroyar vinna á Fraklandi

Tá vit spurdu fryntliga danan um donsku vónirnar, var hann meira hóvligur.

- Eg fari ikki at tosa so nógv um heiðursmerki. Vit taka ein dyst í senn.

Danmark spæla fjórðingsfinalu móti Noreg, meðan Føroyar skulu spæla móti Slovenia. Báðar 1/4-finalurnar verða spældar hósdagin 26. juni klokkan 17.30 føroyska tíð.

Hoyr alla samrøðuna við Frederik Emil Pedersen ovast