- Vit fjepparar kunnu geva spælarunum eyka kilometrar og orku

Fyrr í dag tóku Ingi Samuelsen og Pætur Nolsøe pulsin í Trier á søguliga HM-dystardegnum. 

Millum annað tosaðu teir við spentar fjepparar.

Sí eisini: Abbi at tveimum leikarum: Royni ikki at vera alt ov spentur 

Ein teirra var Jóngerð Martinsdóttir Nielsen, sum er til sítt triðja vaksnamannaendaspæl á rað.

Hon var í Berlin sum liðleiðari og vøddaviðgeri hjá føroyska manslandsliðnum, seinni í 2024 var Jóngerð í Basel sum ein teimum mongu hundrað fjepparunum, og soleiðis er eisini hesaferð.

- Tað er nakað serligt at vera til. Sjálvandi er tað ymiskt, tá man er partur av einum hópi og toymi, men bæði eru stuttligt, staðfesti Jóngerð Nielsen fyri FM1.

Saman við millum annað beiggjanum Rúna Djurhuus (mitt í) var Jóngerð Nielsen við at ganga á odda millum føroysku fjeppararnar til EM-endaspælið í Sveis fyri einum ári síðani (Mynd: Sverri Egholm)

Jóngerð var leingi virkin í VÍF eisini (Mynd: Sverri Egholm)

Hon var eisini púra greið um leiklutin hjá føroysku fjepparunum: Á áskoðaraplássinum geva tey spælarunum nógv.

- Hesar kvinnurnar hava lagt so nógvar tímar og orku í hondbóltin, og vit skylda teimum at bakka upp og vísa okkara stuðul. Vit fjepparar kunnu geva spælarunum eyka kilometrar og orku, og tað hevur man sæð til onnur endaspøl, staðfestir Jóngerð Nielsen í Trier.

Har spæla Føroyar í kvøld sín fyrsta HM-endaspælsdyst í vaksnamannahondbólti. Dysturin móti Montenegro byrjar klokkan 19.30 føroyska tíð og til ber at fylgja við á FM1 og Portalinum.

Hoyr undansedingina frá fyrr í dag her - prátið við Jóngerð Martinsdóttir Nielsen hoyrist í seinnapartinum í sendingini

Føroysku fjeppararnir fara at hita upp í høllini áðrenn

Beinleiðis undansending frá føroysku upphitingini verður á FM1 frá klokkan 18.00 føroyska tíð. 
Beinleiðis bloggur fer at koyra á Portalinum, og eftir dystin verða samrøður og annað.

Lurta eftir FM1 her