Agnar Prestá
Seinastu níggju árini hava 07 Vestur og ÍF bert tvær ferðir verið í Betrideildini samstundis. Seint seinnapartin skjóta hesi bæði liðini Betrideildina 2023 í gongd við dysti á Dungasandi.
Um hugt verður eftir innanhýsis dystunum millum liðini í 2017 og 2021 so sæst, at 07 Vestur hevur yvirtakið. Tað er kanska ikki so løgið, tí í báðum førum var talan um niðurflytingarár hjá ÍF.
Í 2021 vann ÍF á heimavølli móti 07 Vestur í 3. umfari. Í dystunum hvør sínumegin summarferiuna - øðrum í Sørvági og hinum í Fuglafirði - vann 07 Vestur, og hetta var ein lykil í botnstríðnum.
Í 2017 vann 07 Vestur allar tríggjar dystirnar móti ÍF, ið endaði greitt aftast. Tveir av sigrunum komu við máli í yvirtíðini - í høvuðsheitinum eru dystirnir millum hesi liðini tøtt; størsta undantakið er 1-5 sigurin hjá 07 móti niðurflutta ÍF hetta árið.
Síðst ÍF vann í Sørvági var 2. juni í 2013. Av teimum ÍF-spælarum sum vóru á vøllinum tá, er ein eftir í verandi leikarahópi: Jan Ellingsgaard. Hendan dagin spældu bæði Aleksandar Jovevic og Bartal Eliasen við ÍF - nú hava teir leiklutin sum ávíkavist venjari og høvuðsvenjari hjá liðnum
Les eisini:
Alex Jovevic: - Byrjaðu at arbeiða fram ímóti Betrideildini frá byrjan í fjør
Uros Stojanov: Verður nakað serligt at spæla fyri ÍF aftur
Fuglfirðingar endaðu á 2. plássi hetta kappingarárið og vunnu allar dystirnar móti uppflytarunum úr 07 Vestur. Í 2011 vóru vágamenn eisini uppflytarar men vunnu tá allar tríggjar dystirnar móti ÍF. Samanlagt hevur 07 Vestur havt lítið yvirtak á ÍF, hóast fuglfirðingar millum annað vunnu samanlagt í hálvfinalunum í steypakappingini í 2011. Spurningurin er, um vágamenn byggja uppá í dag, ella um uppflytararnir gera ein vørr á Dungasandi.
Betrideildin menn 2023, 1. umfar
Í dag, leygardagin 04.03
17.00: 07 Vestur - ÍF
Sunnudagin 05.03
15.00:
Víkingur - B36
HB - B68
EB/Streymur - AB (Eiði)
KÍ - TB
Portalurin fer at fylgja Betrideildini tætt í 2023. Vit verða til dystin í Sørvági í dag og hava myndir, tekst, støðudagføringar (livescore) og videosamrøður.
Úrslitini í seinastu seks dystunum millum 07 Vestur og ÍF:
2021:
ÍF - 07 Vestur 1-2
07 Vestur - ÍF 1-0
ÍF - 07 Vestur 3-0
2017:
ÍF - 07 Vestur 1-5
07 Vestur - ÍF 3-2
ÍF - 07 Vestur 0-1
Kelda: Faroesoccer
Vinarliga broyt tínar kennifíla - og privatlívsstillingar fyri at síggja hetta innihald