Áki Johannesen gjørdist dagsins spælari

Tað skuldi eitt sterkt verjuavrik til, um B68 skuldi hava ein møguleika í kvøld, og hóast nakrar stórar møguleikar í fyrra hálvleiki, so syrgdu teir í reyðum fyri, at HB ikki skoraði fyrrenn í brotssparkskappingini. 

Tá slapp Áki Johannesen ikki at standa fyri. Tað hevði høgi miðverjin annars gjørt í ógvuliga nógvum førum. Onkrir skaðar hava darvað hann í pørtum av 2023 og 2022, men annars hevur nummar 24 verið ein umráðandi spælari hjá B68 síðani síðstu tíðina í 1. deild.

Áki gjørdi sítt við at rudda innlegg burtur, kasta seg fyri skot, við at vinna tvídystir og rennidystir úti á vøllinum og tók so líðandi ábyrgd við bóltinum. Hóast sín unga aldur hevur sterki maðurin av Nesi eisini leiðaraevni, umframt høgan vinnaravilja, og hetta skein eisini ígjøgnum á Tórsvølli í kvøld. Hann fekk eisini liðskiparabandið, tá Aleksandur Jensne varð útskiftur í longdu leiktíðini og var fyrsti maður yvir at troysa Sebastian Lau Nielsen, ið brendi úr ellivu metrum.

Áki Johannesen hevur eisini víst seg væl fram í seinastu U21-landsdystunum, og í kvøld varð 20-ára gamli B68'arin uppiborið valdur til dagsins spælara, tá hann við barndómsfelagnum var nær við at skapa sensatiónina og vinna søguligt steypagull.

Áki Johannesen fyllir 21 ár um eina viku (Mynd: Sverri Egholm)

Finalan um Løgmanssteypið 
Í dag, leygardagin 3. november
B68 - HB 3-5  eftir brotssaparkskapping - 0-0 eftir vanliga leiktíð og longda leiktíð

Brotssparkskapping:
Adrian Rúnason Justinussen 0-1
Sebastian Lau Nielsen brennir (Teitur Matras Gestsson bjargar)
Viljormur Davidsen 0-2
Jørgen Nielsen 1-2
Ári Mohr Jónsson 1-3
Hjalti Strømsten 2-3
Heri Hjalt Mohr 2-4
Alex Mellemgaard 3-4
Hanus Sørensen 3-5

Sí eisini: 
HB steypavinnari eftir brotssparkskapping