Agnar Prestá
Einki málstig í dag men tíggju mál og tíggju upplegg í 28 dystum siga eina søgu um, hvussu stóran mun Áki Samuelsen hevur gjørt fyri Ranheim í ár.
Nú er greitt, at 21-ára føroyingurin fær fleiri møguleikar til at vera við at tryggja Trondheim-felagnum uppflyting til fremstu norsku deildina.
Kravið undan seinasta vanliga umfarið í OBOS-deildini var greitt: Ranheim skuldi vinna, samstundis sum Lyn skuldi tapa fyri Start, fyri at Ranheim skuldi vinna seg á play-off pláss (6. pláss). Og soleiðis varð.
Ranheim gjørdi sítt í Sogndal, har Áki Samuelsen spældi 80 minuttir í 3-0 sigrinum.
Samstundis tapti Lyn 3-0 fyri Start, sum við 3-0 sigrinum í Oslo tryggjaði sær beinleiðis uppflyting til Eliteseriuna saman við Vålerenga.
Eftir landsliðssteðgin skal Ranheim í fyrsta syftu spæla tveir dystir móti Kongsvinger. Havnarmaðurin hjá Ranheim skal áðrenn spæla ímóti Ungarn og Fraklandi við U21-landsliðnum.
Vinarliga broyt tínar kennifíla - og privatlívsstillingar fyri at síggja hetta innihald