B36 og B68 bresta saman í kvøld

19. umfar í Betrideildini endar í kvøld við dysti í Gundadali, har Jákup á Borg vitjar aftur við sínum B68-liði.

Felagið úr Nes kommunu hevur ikki fingið nógv stig í ár, og B36 á útivølli sær ikki beinleiðis út sum ein upplagdur møguleiki at skava slík saman. Tó tevjar B68, við fleiri B36’arum í hópinum, helst blóð, nú B36 spælir sín sætta dyst í 18 dagar.

Góða evropeiska gongdin hjá B36 er orsøkin til tøttu dystarskránna. Nú fer tað bert at snúgva seg um Betrideildina. 




B36 vann 2-0, tá liðini hittust í Gundadali tíðliga í ár. Spurningurin er, um teir í reyðum fáa gjørt nakað við teir hvítkløddu í Gundadali hesu ferð (Mynd: Sverri Egholm)

Fýra stig eru upp til HB og níggju stig til KÍ, ið aftur misti stig í gjár. Meðan B68 hugsavnar seg um botnstríðið, er tað oddurin, ið tað snýr seg um hjá B36 - eisiini at halda Víking aftanfyri seg, ið kann gerast lykilin í stríðnum um evropeiskt pláss.

B36 hevur sum heild avgreitt uppgávurnar móti lægru liðnum heilt væl í ár. Spurningurin er so, um drúgva summarskráin fer at síggjast aftur á ymsan hátt í kvøld. Liðið hjá Dan Brimsvík spældi harðan dyst í hitanum í Kroatia hóskvøldið - B68 hevur havt meira enn eina viku at fyrireika seg til hendan dystin.

Fyrsta bríksl í Gundadali verður klokkan 18. Televarpið vísir dystin, FM1 sigur frá, og Portalurin verður til staðar.

19. umfar í Betrideildini hjá monnum

Í dag, mánadagin 21. august
18.00: B36 - B68 

Í gjár, sunnudagin 20. august
EB/Streymur - AB 4-1 (4-0)
8' Filip Djordjevic 1-0
14' Bogi Reinert-Petersen (Gutti Dahl-Olsen) 2-0
34' Bogi Reinert-Petersen  (Filip Djordjevic) 3-0
43' Dánjal Godtfred (Filip Djordjevic) 4-0
64' Bartal Skaalum Petersen (Sam Pollard) 4-1

Sí eisini: EB/Streymur sleit seg meira leyst við sannførandi sigri

KÍ - 07 Vestur 1-1 (1-1)
7' Janus Svabo Samuelsen (Mathias Voss) 0-1
30' René Shaki Joensen (Sivert Gussiås) 1-1

Víkingur - TB 1-0
80' Sølvi Vatnhamar, br 1-0

Reytt kort: Samudeen Musah (84')

Sí eisini: 07 Vestur stríddi seg til stig í Klaksvík

Leygardagin 19. august
HB - ÍF 3-1 (1-0)
33' Áki Samuelsen (Hanus Sørensen) 1-0
77' Elvio Glemini 1-1
84' Adrian Justinussen 2-1
90' Adrian Justinussen 3-1

Støðan:

1. KÍ 49 stig (18 dystir)
2. HB 44 stig (19 dystir)
3. B36 40 stig (18 dystir)
4. Víkingur 36 stig (19 dystir)
5. 07 Vestur 30 stig (19 dystir)
6. EB/Streymur 19 stig (18 dystir)
7. TB 15 stig (19 dystir)
8. B68 14 stig (18 dystir)
9. ÍF 12 stig (19 dystir)
10. AB 10 stig (19 dystir)