Barcelona spilti spælið hjá Inter

Helmingurin av liðunum í áttandapartsfinalunum í ársins Champions League eru nú funnin. Nummar eitt og tvey úr hvørjum bólki eru komin víðari - trý'arnir fara yvir í Europa League.

Bólkur F:
Inter Milan - Barcelona 1-2 (1-1)
Dortmund - Slavia Prag 2-1

Dortmund greiddi sína skyldu á heimavølli, hóast Slavia Prag gav dygga mótsstøðu og eitt reytt kort til Weigl varð givið, tá eitt korter var eftir. Julien Brandt skoraði sigursmálið, tá ein tími var leiktur.


Málskjúttarnir hjá Dortmund í kvøld, Sancho og Brandt, hálvsfevnast (Mynd: EPA)

Ter Stegen, Alba, Pique, Busquets, Arthur og so heimsins besti leikari, Lionel Messi. Millum annað hesir leikararnir vóru ikki á vøllinum fyri á Guiseppe Meazza í kvøld, har Inter hevði fleiri vandamiklar málmøguleikar. Barcelona kom tó á odda miðskeiðis í 1. hálvleiki. Romelu Lukaku javnaði beint fyri steðgin, og heimaliðið royndi at trýsta í 2. hálvleiki, har serliga Lautaro Martinez var vandamikil. Argentinski áleyparin fekk tvey mál kolldømd fyri rangstøðu, og Inter manglaði tí seinastu góðskuna í kvøld. Ístaðin gjørdist 17-ára gamli Ansu Fati yngsti málskjúttin í Champions League-søguni, tá hann legði Barcelona á odda fimm minuttir fyri tíð. Barca ósigrað, og Inter, oddaliðið í Serie A, í Europa League annað árið á rað.


Martinez og hinir Inter-leikararnir kundu irða seg í kvøld (Mynd: EPA)


Stjørnuskotið Fati verður heiðrað (Mynd: EPA)

Endaliga Støðan:
Barcelona 14
Dortmund 10
Inter 7
Slavia Prag 2

Bólkur G:
Benfica - Zenit 3-0 (0-0)
Lyon - RB Leipzig 2-2 (0-2)

Í sera tætta bólkinum var tað Lyon, ið dró longsta stráðið um 2. plássið. Leipzig, ið var víðari undan dystinum, var annars á odda 2-0, men heimaliðið stríddi seg innaftur í dystinum. Í Lissabon komu øll málini í 2. hálvleiki, har Zenit tíðliga fekk ein leikara útvístan. Harvið skal portugisiska liðið spæla í Europa League eftir jól.


Málið hjá Memphis Depay gjørdist avgerandi fyri Lyon í kvøld (Mynd: EPA)

Endaliga Støðan: 
RB Leipzig 11
Lyon 8
Benfica 7
Zenit 7

Bólkur H:
Ajax - Valencia 0-1 (0-1)
Chelsea - Lille 2-1 (2-0)

Í fjør loypti Ajax hvøkk á øll og spældi seg í hálvfinaluna. Har restaðu bert tveir minuttir í, tá Tottenham knústi hjørtini á Ajax í Amsterdam. Í kvøld var eisini stórt vónbrot í niðurlendska høvuðsstaðnum, tí Rodrigo skoraði einsamalla málið í dystinum, og tá liðið hjá Lampard samstundis vann á Lille í London, vóru tað Valencia og Chelsea, ið spældu seg víðari til áttandapartsfinaluna. Ajax skal spæla Europa League-fótbólt. 

Valencia 11
Chelsea 11
Ajax 10
Lille 1


Bólkur E - avgjørdur fyrr í kvøld:

Napoli - Genk 4-0 (3-0)
Salzburg - Liverpool 0-2 (0-0)

Endaliga støðan: 
Liverpool 13
Napoli 12
Red Bull Salzburg 7
Genk 1

Les meira Liverpool gjørdi sítt í Eysturríki