Betrideildarfótbóltur í sjey tímar leygardagin

Tað er nógvur føroyskur fótbóltur á skránni í apríl mánaði, og tað verður tætt ímillum dystirnar í serliga Betrideildini hjá monnum. Eitt umfar kom at enda við grannauppgerðini í Gundadali í gjárkvøldið, og tað næsta er á skránni um fýra dagar.

Páskaaftan, leygardagin 8. apríl, spæla bæði B36 og HB aftur í Gundadali. Tann eini dysturin er tann fyrsti á degnum - Jákup á Borg og B68 vitja - og dysturin hjá HB móti AB er tann, sum byrjar seinast. Fyrsta bríks har er klokkan 18. Hjá B36 og B68 er tað klokkan 13.

Samanlagt verður Betrideildarfótbóltur í umleið sjey tímar dagin fyri Páskadag. ÍF er annað vikuskifti á rað á heimavølli, og hesuferð er talan um grannauppgerð. TB spælir aftur á útivølli - á Eiði - og fyri triðju ferð uppá tríggjar dystir spælir 07 Vestur í Sørvági. Hesaferð skulu føroyameistararnir ein túr vestur. Hesir báðir síðstnevndu dystirnir byrja klokkan 17.

Tað eru útsettu dystirnir, ið gera, at tað er eitt sindur skeiklað í mun til úti- og heimadystir. Leygardagin er talan um 5. umfar, sum í roynd og veru er umfar nummar trý. Mikudagin 12. apríl er aftur fult umfar. Tá er tað útsetta 2. umfarið, sum er á skránni.