David bjóðaður á stóra Fight Night-stevnu

Føroyski nevaleikarin David Konoy sleppur av álvara at royna seg, tá boksefelagið í danska býnum Gilleleje seinni í januar skipar fyri stórari boksistevnu, Gilleleje Fight Night 2024.

David er nevniliga bjóðaður til at vera mótstøðumaður móti einum lokalum boksara í einum av dystunum. Nevniliga móti Rasmus Clemmensen í einum dysti yvir 3 ferðir 3 minuttir í lættmillumvekt.

Í lýsingini fyri boksistevnuni verður sagt, at hesin lokali boksarin, Rasmus Clemmensen, er kropsliga sterkur, og altíð er borgan fyri áhugaverdum og hørðum dystum.

Um David Kunoy skrivar Gilleleje Bokseklub, at talan er um ein dugnaligan boksara við góðum nevum. David hevur boksað 17 dystir og vunnið 13, og tað er borgan fyri góðsku.

13 boksidystir eru á skránni á Gilleleje Fight Night, sum verður hildin leygarkvøldið 20. januar frá klokkan 19 í Gilleleje Hallen.

Høvusdysturin hetta kvøldið verður tá ein kvinnuligur boksari úr Gilleleje, Sofie Rosshaug, sum fyrr hevur vunnið HM-silvur, skal royna seg í sínum fyrsta dysti sum professionellur boksari.

Meira um stevnuna her: Facebook event