Elias spældi sín fyrsta dyst í kappingarárinum

Knøðini hava givið hoyvíkinginum og Kiel høvuðbrýggj og ávisar trupulleikar, men eftir nakrar mánaðir uttanfyri strikurnar, var Elias Ellefsen á Skipagøtu aftur inni á vøllinum, tá týska stórfelagið í gjárkvøldið spældi dyst í 7. umfari í Bundesliguni.

THW Kiel tók ímóti uppflytarunum Portsdam. Botnliðið royndi at fáa sínu fyrstu stig á árinum, og bjóðaði risafavorittinum eitt sindur av í Wunderino leikhøllini. Kiel var tó á odda við tveimum málum í steðginum og vann 27-23. 

Andreas Wolff stóð væl í málinum við 13 bjargingum (37 prosentum). Fasta álopsketan í ár fekk fleiri steðgir hesaferð, tí Nikola Bilyk og Elias Ellefsen á Skipagøtu vóru aftur á liðnum. Báðir høvdu null minuttir í kappingarárinum áðrenn.

Sambært thw-handball.de kom serliga Bilyk væl inn. Elias skeyt eisini eitt mál, teir minuttirnar hann spældi. 22-ára gamli hoyvíkingurin hevði fýra skot, so hann var ikki beinleiðis effektivur. Elias á Skipagøtu er heldur ikki skrásettur fyri nakað upplegg.

Hagtøl frá dystinum

Tað mest umráðandi fyri hann, Kiel og sanniliga eisini føroyska landsliðið er, at spælskiparin kann spæla aftur. Føroyar seta hol á EM-undankappingina um tvær og eina hálva viku, og har hevur spælskiparin við nummar 71 høvuðsleiklutin.

Elias a Skipagøtu aftur á staðnum, har hann helst allarhelst vil vera: Inni á hondbóltsvøllinum. So er spurningurin, hvønn leiklur 22-ára gamli hoyvíkingurin fær í Kiel í ár (Mynd: EHF)

Hákun og teir taptu - Vilhelm og Jóhan bresta saman í dag

Hetta var sætti sigurin av seks møguligum hjá Kiel í oktober - í øllum kappingum. Kiel kom undir liðuna á Füchse, sum tapti á útivølli móti óvæntaða oddaliðnum í Bundesliguni.

Stigatalvan í Bundesliguni

Melsungen hevur higartil verið mest støðugt, saman við Hannover-Burgdorf, sum vann við tveimum málum á Füchse Berlin eftir tættan dyst. 

Hákun West av Teigum spældi eitt sindur og skoraði uppá sítt einasta skot. Annars spældi Tobias Reichmann á høgra vongi, og skoraði hann trý mál. Royndi týskarin hevur fingið flestu minuttirnar - serliga í Champions League har Hákun ikki sleppur framat.

Hákun West av Teigum stríðist fyri spælitíð á høgra vongi hjá sterka týska liðnum (Savnsmynd: Sverri Egholm)

Tapið var ein smeitur fyri Füchse, sum hevur 10 stig fyri sjey dystir. Tað sama hevur THW Kiel. Hannover-Burgdorf hevur eisini 10 stig, men liðið hjá Vilhelmi Poulsen hevur spælt ein dyst færri.

Høgri bakkurin, ið allarmest spælir í verjuni, spælir seinnapartin móti Flensburg-Handewitt. Jóhan á Plógv Hansen og liðfelagirnir vitja til lykladyst.

Hannover er á 2. plássi og kann koma undir liðuna á Melsungen í oddinum. Flensburg-Handewitt hevur ógvuliga sterkt lið og kann eisini koma upp á 2. pláss - liðið hevur níggju stig í tøttu Bundesliguni.

Stigatalvan í Bundesliguni