European League: Nógvir føroyingar skulu nú stríðast um at koma í bólkaspælið

Hondbóltskappingarárið er farið í gongd ymsastaðni í Evropa, og hetta vikuskifti og næsta vikuskifti spæla 24 lið um at koma í bólkaspælið í Europan League - 
næststerkastu evropeisku kappingini. 

Fimm av liðunum hava føroyingar á teimum:

European League play-off (røkkstøkkdystir) - Fyrru dystirnir
Í dag, leygardagin 30. august

14.00: Skanderborg AGF (Jóhan á Plógv Hansen - Maritimo (Portugal) 

16.00: Minaur Baia Mare (Rumenia)* - Stjarnan (Jóhannes Bjørgvin)

17.00: Chobry Glogow - Karlskrona (Tróndur Mikkelsen)

Í morgin, sunnudagin 31. august

15.15: Malmö - IK Sävehof (Ísak Vedelsbøl)

16.00: Hannover-Burgdorf (Vilhelm Poulsen) - Alkaloid

* Baia Mare hevur fyrrverandi VÍF-venjaran Nuno Farelo sum oddamann

Tvey tey seinastu árini hevur Flensburg-Handewitt vunnið European League. Tað hevur verið við Jóhan á Plógv Hansen á liðnum. Nú er høgri vongurin úr Havn aftur í donskum hondbólti og Skanderborg, sum skal royna at koppa portugisiskari mótstøðu fyri at røkka bólkaspælinum

Jóhan er tvífaldur European League-vinnari (Mynd: EPA)

Tróndur Mikkelsen er nú í svenskum hondbólt. Karlskrona skal royna at fáa eitt brúkiligt útgangsstøði við úr Póllandi, og føroyski landsliðsbakkrin kann fáa stóran leiklut.

Stjarnan møtir sterkari rumenskari mótstøðu í dag. Talan er um liðið, sum portugisin Nuno Farelo - fyrr VÍF - stjórnar. Nuno var millum annað venjari hjá Jóhannes Bjørgvin í Vestmanna. Vinstri vongurin er í sínum ári nummar tvey í íslendskum hondbólti.

Sí eisini: Jóhannes Bjørgvin heldur fram í Stjørnuni

Jóhannes Bjørgvin í steypafinaluni í fjør móti Fram. Fram er í bólkaspælinum í Europan League, meðan Stjarnan fer at royna at stríða seg í hana (Mynd: Harald Bjørgvin)

Í morgin hava Ísak Vedelsbøl og Vilhelm Poulsen áhugaverdar uppgávur móti ávíkavist kendari svenskari mótstøðu og liðnum hjá Kiril Lazarov.

Dánjal Ragnarsson og íslendsku meistarnir Fram eru beinleiðis víðari til bólkaspælið í EL.

Á kvinnusíðuni skulu Maria Pálsdóttir Nólsoy og Jana Mittún í heyst royna seg í European League - Maria og Horsens skulu spæla play-off dystir síðst í september og fyrst í oktober, meðan Jana og Viborg eru í bólkaspælinum.

Føroysk feløg (StÍF hjá monnum og H71 á báðum síðum) eru í European Cup, sum er 3. stig í evropeiskum kappingum, meðan Hákun West av Teigum, Óli Mittún og Pernille Brandenborg skulu spæla í Champions League.