Sverri Egholm
Leygardagin klokkan 13 fer fyrsta vektstongin upp um høvd við FM 2024 í olympiskari vektlyfting.
Kappast verður í nýggju hølunum hjá Burn Klassik í Berjabrekku 1 í Havn. Kvinnurnar byrja klokkan 13. Menninir byrja umleið klokkan 14:30/15:00.
Áhugin fyri FM í vektlyfting plagar at vera stórur, tí vektlyfting er bæði spennandi og undirhaldandi ítróttagrein. Áskoðarar hava ókeypis atgongd.
22 lyftarar fara at royna síni lyftikynstir, og tað er full javnstøða: 11 kvinnur og 11 menn. Talan er bæði um royndar og nýggjar lyftarar, og øll hava síni ymisku mál. Tað kann vera at vinna sær rættin til luttøku í altjóða kappingum ella bara at betra egin avrik og við tíðini at luttaka í øðrum kappingum.
Menningin í føroyskari vektlyfting hevur gingið við rúkandi ferð síðstu árini, og Føroya Styrkisamband verður tí í heyst vertur fyri NM 2024. Málið er at fáa so nógvar føroyskarar lyftarar við sum gjørligt, og onkur lyftari fer í morgtin at royna at lyfta seg til atgongd til NM. Í næstum verður kunngjørt, hvar ið NM verður hildið.
Vinarliga broyt tínar kennifíla - og privatlívsstillingar fyri at síggja hetta innihald