Føroyar fáa sína HM-lagnu at vita í kvøld

Nations League var av í seinasta mánaði, og í mars fer næsta kapping hjá føroyska A-landsliðnum hjá monnum í gongd.

Talan er um undankappingina til HM-endaspælið í Katar í 2022. Seks styrkisbólkar eru - fimm við tíggju liðum og ein við fimm liðum. Í tí niðasta bólkinum eru fimm tey lægst styrkismettu landsliðini í UEFA. Í fimm av teimum tíggju bólkunum, ið verða gjørdir, verður eitt av hesum liðunum, og fyri Føroyar hevði tað verið ein fyrimunur at enda í ein av bólkunum, tí í so fall stendur liðið hjá Håkani Ericson til at hava góðar møguleikar fyri at fáa stig í, í minsta lagi tveimum dystum. Har eru møguleikarnir Malta, ið Føroyar hava spælt seks ferðir ímóti seinastu trý árini, San Marino, ið allarhelst er veikasta liðið í undankappingini, umframt Moldova, Liktinstein og Gibraltar, sum Føroyar ongantíð hava verið í bólki saman við. 

Nógvir føroyskir fótbóltsfjepparar ynskja Ongland úr tí sterkasta bólkinum. Tað er eitt av londunum, ið føroyska A-landsliðið ongantíð fyrr hevur verið í bólki við fyrr. Hetta seinna er eisini galdandi fyri Kroatia, ið var í HM-finaluni í 2018 - Hallur Hansson ynskir at møta millum annað heimsmeistarunum - og fyri fleiri lið í styrkisbólki 4: Montenegro, Norðurmakedónia, Albania, Bulgaria og Hvítarussland.

Føroyar kunnu ikki verða í bólki saman við Íslandi. Tað er orsakað av veðurviðurskiftinum í londunum, boðar UEFA frá. Tað snýr seg um, at tvey lið ið ikki kunnu hýsa dystum í mars og november orsaka av veðurlagnum ikki skulu vera í bólki saman. Tríggir leikdagar verða í mars, og hetta nýtir UEFA sum grundgeving fyri avgerðini.

Til ber at fylgja lutakastinum á heimasíðuni hjá UEFA

Styrkisbólkur 1
Belgia, Frakland, Ongland, Portugal, Spania, Italia, Kroatia, Danmark, Týskland og Holland

Styrkisbólkur 2
Sveis, Wales, Pólland, Svøríki, Eysturríki, Ukraina, Serbia, Turkaland, Slovakia og Rumenia

Styrkisbólkur 3
Russland, Ungarn, Írland, Kekkia, Noreg, Norðurírland, Ísland, Skottland, Grikkaland og Finnland

Styrkisbólkur 4
Bosnia, Slovenia, Montenegro, Norðurmakedónia, Albania, Bulgaria, Ísrael, Hvítarussland, Georgia og Luksemborg

Styrkisbólkur 5
Armenia, Kýpros, FØROYAR, Aserbadjan, Estland, Kasakstan, Kosovo, Litava, Lettland og Andorra

Styrkisbólkur 6
Malta, Moldova, Liktinstein, Gibraltar og San Marino