Fróði Hansen berjist fyri seinastu ferð á MMA-stevnu á Hálsi

Føroyski MMA-kemparin, Fróði Hansen, fer 20. mai 2023 ár at kempa sín seinasta yrkiskamp í Høllini á Hálsi í Havn.

Fróði hevur altíð droymt um at enda sína flottu yrkisleið innan MMA í Føroyum, og nú verður dreymurin til veruleika.

Tað verða tilsamans 10 kampar við kemparum úr Danmark og øðrum londum. Tað verður ein heilur dagur við fleiri kampum, og møguleiki verður at keypa nógv gott at drekka og eta allan dagin.

Stigtakararnir leggja stóran dent á, at tað verður eitt tiltak á høgum støði, og at tað verður ein stór uppliving fyri allar áskoðarar.

MMA-dagurin verður 20. mai í Høllini á Hálsi

- Vit vóna, at hetta tilboðið fær so góða undirtøku, at hetta verður eitt afturvendandi tiltak á hvørjum ári, og at tað gerst eitt íkast til kampítróttina í Føroyum, sum seinastu árini er blivin meira fjølbroytt og professionell, sigur Fróði Hansen, sum er ein av
stigtakarunum.

Meira kunning fæst á Facebook- og Instagram-vangunum ‘MMA Føroyar’

MMA standur fyri ‘Mixed Martial Arts’. Talan er um eina stríðsítrótt, har har tað verður bæði boksað og sparkað.