Fyrsti landskappingardysturin hjá Óla í Danmark sæst á TV2

Óli Mittún spælir aftur í gulum í ár, men nú er tað í gulum og reyðum heldur enn gulum og svørtum - í Danmark heldur enn í Svøríki.

Skiftið hjá føroyska úrmælinginum frá Sävehof til GOG hevur verið eitt tað mest umrødda í Skandinavia og í hondbóltsheiminum sum heild seinastu mánaðirnar.

Tað er væl og virðiliga staðfest, millum annað frá høvuðspersóninum, at hann kundi valt stórfeløg í Bundesliguni ístaðin. Í Danmark, og serliga á Fjóni, fegnast man um, at Óli Mittún næstu árini verður at síggja í donskum hondbólti.

Vónirnar til 20-ára gamla føroyingin eru stórar, og í sínum fyrsta almenna dysti í Danmark mánakvøldið, gjørdist Óli javnsettur toppskjútti við sjey málum.

Sí eisini: Óli Mittún javnsettur toppskjútti í fyrsta kappingardystinum

Mynd: GOG

Hetta var í steypakappingini móti HC Midtjylland úr næstbestu deildini. Nú snýr tað seg um landskappingina og Skjern.

Júst Skjern sló GOG út í DM-hálvfinalunum í fjør, men GOG fekk Champions League-plássið, og tískil er langt upp til stóran spenning seinnapartin - eisini tí Óli Mittún fyrstu ferð skal vísa seg fram í Herreligaen.

Hetta ber til at síggja á TV2 og TV2 Play. Hetta sæst millum annað í Televarpinum. Dysturin byrjar klokkan 15.

Teis verður helst tann triði

Pauli Jacobsen fekk eina lítla løtu á vøllinum, tá HØJ tapti tepurt fyri Mors-Thy mikukvøldið í fyrstu royndini hjá uppflytarunum í deildini.

Alt bendir á, at ein triði føroyski landsliðsspælari kemur í deildina. 

Sum vit skrivaðu í gjár, so hevur Teis Horn Rasmussen nú sína hondbóltsframtíð uppá pláss, og verður hann kunngjørdur í nýggju felagi um vikskifti.

Teis Horn Rasmussen hevur bíðað - og bíðað - men nú er ein staðfesting um sáttmála komin (Mynd: Sverri Egholm)

Tær flestu upplýsingarnar hava peikað á Ribe-Esbjerg, sum skal hava fingið eina avtalu í lag eftir eitt langt summar við bíðistøðu. Síðani greinina í gjárkvøldið, hevur Portalurin eisini fingið fleiri ábendingar um, at tað verður í Esbjerg, at Teis verður avdúkaður sum nýggjur spælari.

Hetta kann verða í sambandi við fyrsta kappingardystin hjá Ribe/Esbjerg, sum verður móti Sønderjyske klokkan 15.