Teis hevur nú sína hondbóltsframtíð uppá pláss

Tað hevur verið meira ella minni greitt í eina tíð, at Teis Horn Rasmussen vil royna nakað annað enn Århus Håndbold og næstbestu donsku deildina.

Men sum vit skrivaðu í síðstu viku, so hevur tað drigið eitt sindur út at endaliga fáa hondbóltsframtíðina uppá pláss, hóast áhugi hevur verið fyri sterka føroyska strikuspælaranum og miðverjanum ymsastaðni.

Teis hevur seinastu tíðina millum annað hildið seg í gongd við at venja í Århus, meðan samband hevur verið millm hann - ella umboðsmannin - og ymisk feløg. 

Ein avtala er uppá pláss

1. umfar í millum annað Herre Håndbold Ligaen og Bundesliguni eru í gongd. Tað eru feløg í hesum báðum deildunum, sum Teis Horn Rasmussen hevur verið settur í samband við.

Portalurin hevur nú fingið váttað, at 29-ára gamli føroyingurin hevur skrivað undir ein sáttmála og verður kunngjørdur um vikuskiftið - helst leygardagin og helst í einari høll. 

Talan verður eisini um eitt stig upp á hondbóltsleiðini

Hetta er ógvuliga týðandi fyri Teis og eisini føroyska landsliðið, har hann er profilur.

Teis Horn Rasmussen kann av álvara smílast og fara undir næsta kapittli á hondbólsleiðini (Mynd: Sverri Eghom)

Mest sannlíkt Ribe/Esbjerg

Tað er ikki eydnast okkum at fáa endaliga váttað, hvat felag tað er, sum Teis Horn Rasmussen skal spæla fyri.

Men sambært fleiri keldum - í Føroyum og uttanlands - peikar tað mesta á Ribe/Esbjerg.

Felagið í fremstu donsku deildini hevur víst Teisi áhuga og er eisini heldur tunt á strikuplássinum. 

Ribe/Esbjerg spælir í morgin klokkan 16 á heimavølli móti Sønderjyske, og tað er ikki púra óvæntað, um Teis Horn Rasmussen verður kunngjørdur í Esbjerg um tað mundið.

Um so er, verður havnarmaðurin triði føroyski landsliðsspælarin í bestu donsku deildini: Óli Mittún og Pauli Jacobsen spæla nú eisini har.

Skjern, sum er eitt nakað størri felag í Danmark, og Wetzlar í Bundesliguni hava eisini verið nevnd sum møguleikar hjá Teisi. Tey spæla eisini sínar fyrstu landskappingardystir í morgin. Vit hava tó - sum nú er - serliga eyguni mótivegis Esbjerg.