Gunnar avloysir Teit

Liðið hjá Føroyum í Ísrael er sett, og tvær broytingar eru í mun til dystin fríggjakvøldið.

Tann eina er nátúrlig, við at Brandur Hendriksson kemur inn aftur á liðið eftir leikbann fyri Gunnar Vatnhamar, ið fekk leikbann orsakað av gulum korti í Parkini. Hon ger helst, at føroyska spælið verður nakað øðrvísi, tí talan er um eitt heilt annað slag av fótbóltsleikara.


Brandur Hendriksson (t.h) verður aftur at síggja á føroyska liðnum í kvøld - René Shaki Joensen (t.v) skal spæla í heimlandinum hjá pápa sínum (Mynd: Jens Kr. Vang)


Gunnar Vatnhamar (næstuttast til høgru) er ikki tøkur til dystin í dag vegna leikbann. Stóribeiggi hansara, Jóan Símun Edmundsson og Odmar Færø byrja á somu plássum sum fríggjakvøldið (Mynd: Sverri Egholm)

Hin er, á sín hátt, meira merkisverd. Gunnar Nielsen hevur seinastu fimm dystirnar sitið á bonkinum, meðan Teitur Matras Gestsson hevur vart føroyska málið. Serliga fyrsta avrikið móti Danmark var frálíkt, og HB-málverjin lat fimm mál inn í fýra dystum á Tórsvølli í september og oktober, har hansara ígongdsetan við serliga longum og beinraknum útspørkum gjørdu mun fyri føroyska spælið. Teitur var partvís óheppin og partvíst ikki heilt á rætta staði í samband við donsku málini fríggjakvøldið, men um tað hevur nakað við hetta at gera, um tað er taktiskt, ella um tað er fyri at síggja Gunnar í dysti aftur, er óvist.

Jóan Símun Edmundsson er komin so mikið fyri seg eftir slagið í høvdið, ið hann fekk stutt fyri steðgin í Parkini, at hann toftamaðurin kann byrja inni. Tað gjørdi, at Klæmint Andrasson Olsen kom inn, og rituvíkingurin skoraði seint í dystinum. 31-ára gamli áleyparin verður helst eisini nýttur sum innskiftari hesuferð. Hildið verður fast í fimm-mansverju og júst somu leikarum.

Føroyska liðið móti Ísrael (5-4-1/3-4-3): Gunnar Nielsen - René Shaki Joensen, Odmar Færø, Hørður Askham, Sonni Ragnar Nattestad, Viljormur Davidsen - Hallur Hansson (L), Brandur Hendriksson Olsen Jákup Biskopstø Andreasen, Sølvi Vatnhamar - Jóan Símun Edmundsson 

Bonkur: Teitur Matras Gestsson, Mattias Lamhauge, Heri Hjalt Mohr, Bartal Wardum, Jóannes Bjartalíð, Hannes Agnarsson, Klæmint Andrasson Olsen, Bjarni Petersen, Tróndur Jensen, Petur Knudsen, Heðin Hansen, Patrik Johannesen


Klæmint Andrasson Olsen hevur nú skorað níggju landsliðsmál fyri Føroyar - spurningurin er, um hann kemur inn og fær nummar tíggju í kvøld (Mynd: Sverri Egholm)


Hørður Askham spældi heilt væl í føroysku miðverjuni fríggjakvøldið og byrjar aftur inni (Mynd: Sverri Egholm)

Dagført: 18.56

Sí eisini: 
Føroyskt stig kann geva peningin yvir seks ferðir aftur
- Skulu reisa okkum frá úrslitinum móti teimum í Føroyum
Fyri aðru ferð í Ísrael