HB og AC Horsens býtt um venjara

44 ára gamli Jonas Dal Andersen er nýggjur høvuðsvenjari hjá besta mansliðnum hjá HB.

Hesum boðar Havnar Bóltfelag frá á heimasíðuni í kvøld.

Tað kom sum ein skelkur mánadagin, tá tað varð kunngjørt, at Jens Berthel Askou, sum leiddi HB til greipuna í fjør, steðgaði sum venjari, og hevði fingið arbeiði sum høvuðsvenjari í AC Horsens.

Nú er so greitt, at Jonas Dal Andersen, sum til fyri stuttari tíð síðani stóð á odda fyri AC Horsens, skal venja HB.

Jonas er 44-ára gamal, hevur DBU Pro-venjaraútbúgving, og er ein royndur maður í donskum fótbólti. Hann var í nógv ár knýttur at venjaratoyminum hjá FC Midtjylland, har hann m.a. var við til seta fótbóltsakademii hjá FCM á stovn. Í 2013 royndi hann seg sum høvuðsvenjara hjá Hobro IK, sum hann fekk upp í Superliguna. Síðani hevur hann verið høvuðsvenjari hjá Esbjerg (Superliga), Kjellerup (2. div.), FC Fredericia (1. div.) og AC Horsens (Superliga), skrivar HB um nýggja venjaran.

Sáttmálin er galdandi til árslok 2022.