Fótbóltur

Hópurin til dystirnar móti Ukraina og Ungarn úttikin

Jacoba Langgaard, Kára Djurhuus og Sara Samson Lamhauge eru við aftur eftir skaða og eru millum tær tjúgu, ið verða við til dystirnar. Eyðvør Klakstein verður aftur at síggja í einum landsliðshópi til heimadystin móti Ungarn 26. oktober.

Maria Biskopstø skoraði fyri Føroyar í Skotlandi í síðsta mánaða. Hon er aftur ein av teimum úttiknu (Mynd: Bjarni Enghamar/FSF)

Maria Biskopstø skoraði fyri Føroyar í Skotlandi í síðsta mánaða. Hon er aftur ein av teimum úttiknu (Mynd: Bjarni Enghamar/FSF)

2021-10-08 13:59 Author image
Agnar Prestá
placeholder

A-landsliðið við kvinnum hevur tríggjar dystir eftir at spæla áðrenn ársskiftið, og tveir av teimum eru á skránni seinni í hesum mánaðinum.

Hóskvøldið 21. oktober spæla føroysku kvinnurnar í Kiev, og fimm dagar seinni – týskvøldið 26. oktober kl.18.00 – bresta Føroyar og Ungarn saman á Tórsvølli. Talan er um tveir dystir, har metast kann, at Føroyar hava betri møguleikar at spæla meira evið enn móti Spania og Skotlandi.

Heimasíðan hjá Fótbóltssambandinum skrivar, at Lene B. Terp nú hevur úttikið hópin til dystirnar, og at leikararnir, sum hesaferð eru úttiknar, hava allar verið við A-landsliðnum fyrr. Í fleiri førum er talan um spælarar, sum nú er tøkar aftur eftir skaðar.

Hópurin sær soleiðis út:

Ásla Johannesen, AGF (DK)
Julia Naomi Mortensen, AGF (DK)
Rakul Maria Johannesen, B36
Olga Kristina Hansen, B36
Jacoba Langgaard, B36
Lea Símunardóttir Lisberg, EBS
Kára Djurhuus, HB
Sara Samson Lamhauge, HB
Sarita Maria Mittfoss, HB
Óluva Allansdóttir Joensen, KÍ
Birita Ryan, KÍ
Durita Hummeland, KÍ
Sanna Svarvadal, KÍ
Tóra Mohr, KÍ
Maria Biskopstø, KÍ
Tórunn Højgaard Joensen, KÍ
Heidi Sevdal, NSÍ
Maria á Lakjuni, Víkingur
Jensa K. Tórolvsdóttir, Víkingur
Monika Biskopstø, AaB (DK)

Umframt spælararnar á listanum omannfyri, leggjast miðvallarin Eyðvør Klakstein og málverjin Valborg Østerø afturat hópinum til heimadystin móti Ungarn, skrivar fsf.fo.


placeholder
placeholder