Løgmaður og onnur sluppu at royna seg í golfspæli

Serligu gestirnir hjá Ítrórrasambandinum á oyggjaleikunum á Guernsey sluppu í gjár at royna seg í golfi.

Golfleikararnir høvdu skipað fyri einum serligum tiltaki fyri hesum serliga føroyska ferðaliðnum, sum umboðar løgmann, borgarstjórarnar í Havn og Klaksvík, stuðlar hjá ÍSF og umboð fyri starvsnevndina.

Hetta gekk ikki fyri seg á sjálvum oyggjaleika-leikvøllinum í golfi, men á hotellinum, har golfleikarar búgva. Í tilknýti til sera hugnaliga hotellið er nevniliga ein minni golfvøllur har tað eisini er ein vælutgjørd venjingarbreyt – driving range – har tað ber til at venja sløg. Henda driving range er í tveimum hæddum.

Løgmaður og aðrir tignarligir gestir sluppu at royna seg. Hjá løgmanni gekk ikki væl at raka bóltin, kunnu vit heilsa og siga – tá lá munandi betri fyri hjá miðlingasoninum.

Eftir at hava roynt at sláa langt á ‘range’ini’, varð farið á eina puttifløtu ætlað til venjingar, har skipað var fyri eina kapping í at putta – rulla – bóltin rættiliga langt móti einum holi. Tann, ið kom tættast, varð kosin vinnari.

Og vinnari gjørdist stjórin á Atlantsflogi, Jóhanna á Bergi. Hennara bóltur støðgaði bert tvær føtur frá holinum – eitt sera gott putt.

Føroysku golfleikararnir á leikunum hava brúkt teir fyrstu dagarnar á oyggjaleikunum til at venja seg við umstøðurnar. Í dag verður fyrsta kappingin. Kappast verður fýra dagar á rað.

Myndirnar tók Jens Kr. Vang: