Óli Mittún gjørdi um seg í fyrsta landskappingardystinum

Óli Mittún vakti ans í fyrsta landskappingardystinum fyri GOG

GOG og Óli Mittún vunnu í dag á útivølli móti Skjern Håndbold í fyrsta dystinum hetta kappingarárið í Herre Håndbold Ligaen. Úrslitið gjørdist 31-27 til felagsliðið á Suðurfjóni.

Hetta var samtundis eisini fyrstilands kappingardystur hjá 20 ára gamla Óla Mittún í gulu og reyðu troyggjuni hjá GOG. Hann skifti í summar frá svenskum hondbólti í Sävehof til GOG í bestu donsku deildini.

Skjern Håndbold og GOG verða mett at vera liðini, sum fara at kappast við Aalborg Håndbold um meistaraheitið.

Óli Mittún fekk væl uppiborið nógv uppmerksemi frá frásøgumonnunum, sum søgdu frá dystinum á TV2. Einki løgið í tí, tí hoyvíkingurin var við í alt kalla øllum, sum GOG gjørdi í álopinum, og legði ferð eftir ferð upp til sínar viðleikarar. Óli Mittún brendi tó ov nógvar møguleikar sjálvur.

Óli Mittún er skrásettur fyri fimm mál uppá ellivu skotroyndir, og skrásettur fyri trý upplegg til mál.

Umframt hetta vann nummar 78 fimm brotskøst og syrgdi fyri, at Skjern fekk fleiri útvísingar - umframt at hann sum heild tekur nógv uppmerksemi.

GOG leggur væl frá landið í fyrsta dystinum hetta kappingarárið. Annað umfar verður spælt hósdagin, og tá kemur TTH Holstebro á vitjan á nýggja heimavøllinum hjá GOG í Svendborg.

Skjern Håndbold - GOG 31-27 (13-15)

Sí eisini: Váttað: Teis Horn Rasmussen til Ribe Esbjerg