Agnar Prestá
IK Sävehof og Ystads IF eru í svensku meistarafinalunum hjá monnum, og finala nummar eitt av í øllum førum trimum - møguliga fýra ella fimm - varð spæld í Partille í gjár.
Talan gjørdist um ein tættan dyst, har Sävehof tó fekk slitið seg eitt sindur leyst í 2. hálvleiki. Í steðginum var 12-12. Tað var +3 til heimaliðið í nøkrum førum eftir steðgin - eisini tá ein lítil løta var eftir. Ystads fekk minkað til 28-27, men tað var ov seint at fáa nakað við.
Til ber at lesa meira um gongdina - á svenskum - her
Harvið hevur Sävehof fyrimunin eftir fyrstu finaluna, og tað er millum annað Óla Mittún at takka. 18-ára gamli hoyvíkingurin skoraði átta mál og legði upp til fleiri afturat. Kviki føroyski bakspælarin varð í seinastu viku kosin ársins spælskipari í Svøríki, og nú jagstra hann og liðfelagirnir gull.
Kravið er at vinna tríggjar finalur, og mikukvøldið kann Sävehof longu tryggjað sær ein dystarbólt. Til tess krevst ein sigur í Ystads. Finala nummar tvey byrjar í morgin klokkan 17 føroyska tíð.
Vinarliga broyt tínar kennifíla - og privatlívsstillingar fyri at síggja hetta innihald