Skulu í eldin í Kosovo í kvøld

Hjá føroyska A-landsliðnum við kvinnum snýr tað seg um at vinna samanlagt yvir tveir dystir í Kosovo fyri at fáa rættin at spæla í einum øðrum play-off í apríl næsta ár.

Tað er góður møguleiki til tess; íhvussu er um hugt verður eftir oddsunum hjá nógvum veddingarfyritøkum. Hjá teimum allarflestu liggur tað ímillum odds 1,30 og 1,38. Hinvegin gevur ein sigur til heimaliðið í kvøld peningin meira enn fýra ferðir aftur.

Hondbóltssamandið ger tó á Facebook-síðu sínari seinnapartin, at talan er um sterkari mótsstøðu enn hetta.

- Veddingarfyritøkurnar hava Føroyar sum favoritt, men er talan um eitt kosovoianskt lið, sum er styrknað í seinastuni, tá onkur lyklaleikari, sum hevur verið burtur frá liðnum í eina tíð nú er við aftur. Kosovo hevur fleiri leikarar, sum spæla í m.a. donsku, sveisisku og týsku liguni.

Annars skrivar Hondbóltssambandið, at føroysku kvinnurnar hava havt seinastu venjingina undan dystinum móti Kosovo í kvøld, at liðið er væl fyrireikað, og og at allir leikarar eru klárir.

Føroyar hava eitt ungt landslið, og millum annað 18-ára gamla Maria Pálsdóttir Nólsoy er við í Kosovo. Turið Arge Samuelsen er ikki tøk hesuferð.

Dysturin í býnum Istog byrjar klokkan 18.30 føroyska tíð. Heimasíðan hjá Kringvarpinum stroymir dystin. 
 Hópurin hjá Føroyum til dystin móti Íslandi á Skála leygarkvøldið. Dagin eftir spældu liðini í Klaksvík. Í báðum førum vann Ísland við fimm málum (Mynd: Hondbóltssamband Føroya)