Váttað: Ancelotti verður venjari hjá Everton

Í løtuni er ein heilt serligur fótbóltsdystur í gongd á Goodison Park í Liverpool. Tað er fyrsti dystur í 18. umfari í Premier League, har Everton tekur ímóti Arsenal. Liðini hava tað til felags, at tey havt eitt sera miseydnað kappingarár higartil, og hava leitað eftir einum nýggjum høvuðsvenjara seinastu tíðina.

Les eisini: Arsenal og Everton nærkast venjaraloysnum

Unai Emery varð uppsagdur í Arsenal seinast í novemner, og í gjár varð fyrrverandi miðvallari felagsins, ið eisini spældi seks ár við Everton, avdúkaður sum nýggjur venjari. 37-ára gamli Mikel Arteta hevur síðani hann steðgaði sum leikari í 2016 verið í venjaratoyminum hjá Pep Guardiola í Manchester City. Hann er ikki á síðulinjuni í dag men á áskoðaraplássinum. Sviin Frederik Ljungberg stendur fyri sættu og seinastu ferð fyribils á odda fyri Arsenal.

Mynd: EPA

Á áskoðaraplássinum er eisini navnframi Carlo Ancelotti. Hann hevur vunnið tað sum vinnast kann sum leikari og venjari. og nú skal 60-ára gamli italiumaðurin taka yvir í Everton. Hann vann Premier League og FA Cup, meðan hann var í Chelsea frá 2009 til 2011. Annars hevur Ancelotti stjórnað Juventus, AC Milan, Real Madrid, PSG, Bayern Munchen og seinast Napoli, har hann var uppsagdur í síðstu viku.

Ancelotti hevur skrivað undir ein sáttmála, ið er galdandi fyri fýra og eitt hálvt ár. Marco Silva var uppsagdur fyrr í mánaðinum, og síðani hevur skotin Duncan Ferguson, ið var áleypari í felagnum leingi, fyribils havt ábyrgdina og staðið seg væl. Í dag eru hann og Ljungberg á síðunlinjuni fyri seinastu ferð við evstu ábyrgd. Feguson verður partur av venjaratoyminum hjá Ancelotti.

Støðan í steðginum er 0-0.